Oljas Bektenov kommýnaldyq qyzmetterdi tutyný normalaryn engizýdi tapsyrdy
ASTANA. KAZINFORM — Bıyl tabıǵı monopolııalar salalarynda rettelip kórsetiletin kommýnaldyq qyzmetterdi tutyný mólsherine qaraı tutyný normalary engiziledi. Bul týraly Úkimet otyrysynda Premer-Mınıstr Oljas Bektenov aıtty.
«Memleket basshysy eldiń energetıkalyq qaýipsizdigin qamtamasyz etý boıynsha mindetter qoıdy. Energetıka mınıstrligi qarjylyq damý ınstıtýttarymen birge 1 qarashaǵa deıin jańa generatsııa obektileriniń qurylysyna uzaq merzimdi nesıe berý mehanızmderin ázirlesin», - dedi ol.
Osy oraıda Premer-Mınıstr atom stantsııasynyń qurylysy boıynsha referendým ótkiziletin kún belgili bolǵanyn, Memleket basshysy keshe tıisti Jarlyqqa qol qoıǵanyn eske saldy.
«Osyǵan baılanysty Energetıka mınıstrligi múddeli memlekettik organdarmen birge respýblıkalyq referendýmdy uıymdastyrý jáne 6 qazanda sapaly ótkizý jóninde sharalar qabyldaýy qajet», - dedi Oljas Bektenov.
Munan bólek, Premer-Mınıstr Ulttyq ekonomıka mınıstrligine múddeli memlekettik organdarmen birge bıylǵy 1 qarashaǵa deıin Úkimetke Energetıkalyq jáne kommýnaldyq ınfraqurylymdy jańǵyrtý jónindegi ulttyq jobany bekitý týraly qaýly jobasyn engizýdy tapsyrdy.
«Sondaı-aq Memleket basshysy kelesi jyldan bastap naqty tutyný normalaryn engizý qajettigin atap ótti. Sondyqtan adamdardy resýrstardy utymdy paıdalanýǵa yntalandyrý kerek. Ulttyq ekonomıka mınıstrligi bıylǵy jyldyń sońyna deıin tabıǵı monopolııalar salalarynda rettelip kórsetiletin kommýnaldyq qyzmetterdi tutyný mólsherine qaraı tutyný normalaryn engizsin», - dedi ol.
