Oljas Bektenov kommýnaldyq qyzmet tarıfteri men baǵalarynyń negizsiz ósýin baqylaýǵa alýdy tapsyrdy

ASTANA. KAZINFORM – Inflıatsııaǵa rettelip kórsetiletin qyzmet tarıfteri men baǵalarynan bolatyn áserdiń eń tómen úles salmaǵy Ekonomıkalyq saıasat jónindegi keńes belgilegen deńgeıde saqtalýy tıis. Bul týraly búgin Úkimet otyrysynda Premer-Mınıstr Oljas Bektenov aıtty.

- Investıtsııa men qosymsha quny joǵary óndiristerdi tartý úshin daıyn ınfraqurylymnyń qoljetimdi bolýyn qamtamasyz etý mańyzdy. Kóbinese ónerkásiptik alańdar qurylǵannan keıin ákimdikter tarapynan qajetti ınfraqurylymdy qarjylandyrýǵa jetkilikti kóńil bólinbeıdi. Máselen, ınfraqurylymdy óz qarjysyna jetkizý múmkindigi bar óńirler respýblıkalyq bıýdjetten qarjylandyrýdy jyldap kútedi. Osyǵan baılanysty óńirler bıýdjetti qalyptastyrý kezinde ónerkásiptik alańdardyń ınfraqurylymyn salýǵa qarajattyń bólinýin eskerýi qajet, - dedi Úkimet basshysy.

Premer-Mınıstr elektr energııasymen, jylýmen jáne sýmen jabdyqtaý jelileriniń tozýyn tómendetý boıynsha aýqymdy jumys atqarylyp jatqanyn basa aıtty.

- Salalyq mınıstrlikter men óńirler «Tarıfti ınvestıtsııaǵa aıyrbastaý» baǵdarlamasyn sapaly iske asyrýdy qamtamasyz etýi qajet. Sondaı-aq, teńdestirilgen tarıftik saıasatty jalǵastyrý mańyzdy, óıtkeni ol basqa da tutyný naryqtaryndaǵy baǵanyń ósýine áser etedi. Ulttyq ekonomıka mınıstrligi men salalyq memlekettik organdar ekonomıkalyq jáne áleýmettik jaǵynan tepe-teńdikti saqtaı otyryp, kommýnaldyq qyzmet tarıfteri men baǵalarynyń negizsiz ósýin baqylaýǵa alsyn. Inflıatsııaǵa rettelip kórsetiletin qyzmet tarıfteri men baǵalarynan bolatyn áserdiń eń tómen úles salmaǵyn Ekonomıkalyq saıasat jónindegi keńes belgilegen deńgeıde saqtaýdy tapsyramyn, - dedi ol.