Oljas Bektenov kólik salasynyń transformatsııasyn tekserdi
ASTANA. KAZINFORM – Premer-mınıstr Oljas Bektenov Prezıdenttiń kólik salasyn tsıfrlandyrý jónindegi tapsyrmalarynyń oryndalý barysymen tanysty. Bul týraly Úkimettiń baspasóz qyzmeti habarlady.
Kólik mınıstrliginiń Ahýaldyq ortalyǵynda Premer-mınıstrge avtojol, temirjol jáne avıatsııa salalarynda engizilip jatqan zamanaýı sheshimder men IT-ázirlemeler usynyldy. Atap aıtqanda, ulttyq beınebaqylaý júıesi, e-Joldar, Smart Cargo, Q-Gate, QazETA, Echelon Alpha, KinetiX jáne Trip Optimizer kórsetildi.
Avtojol salasynda kameralardyń derekterin, salmaqty baqylaý jáne jol aqysyn tóleý júıelerin qamtıtyn Ulttyq beınebaqylaý júıesi (UBBJ) engizilip jatyr. Bolashaqta JI qoldaný zańbuzýshylyqtardy tirkep qana qoımaı, táýekelderdi boljaýǵa, kóliktegi jaǵdaıdy taldaýǵa jáne JKO-lardyń aldyn alýǵa múmkindik beredi.
E-Joldar avtomobıl joldaryn baqylaý júıesi shamamen eki aı buryn iske qosyldy jáne joldardyń jaı-kúıin, materıaldardyń sapasyn, sondaı-aq jóndeý shyǵyndaryn baqylaýǵa múmkindik beredi. Qazir respýblıkalyq mańyzy bar 41 myń shaqyrymnan astam jol tsıfrlandyryldy. Jyl sońyna deıin uzyndyǵy 185 myń shaqyrym bolatyn elimizdiń barlyq jol jelisin qamtý josparlanyp otyr.
Smart Cargo platformasy «bir tereze» qaǵıdaty boıynsha halyqaralyq júk aǵyndaryn onlaın-qadaǵalaýdy qamtamasyz etedi. Ol 58 aqparattyq júıeniń derekterin biriktirdi. Bul júkterdi 100% izinen qarap otyrýǵa, olardyń shekaradan ótý jyldamdyǵyn 30%-ǵa arttyrýǵa jáne tasymaldaýshylardyń kezekte turý ýaqytyn 10 ese qysqartýǵa múmkindik berdi.
Elimizdiń áýejaılarynda Q-Gate termınaldary ornatylǵan, olar jolaýshylardy bet bıometrııasy men tólqujaty boıynsha 15-50 sekýndta tekseredi. Bul standartty baqylaýdan 4-5 ese jyldam. Sondaı-aq, QazETA, ıaǵnı «sheteldikterge arnalǵan e-Gov» platformasy tanystyryldy, ol vızasyz týrısterge elge kirýden 72 saǵat buryn onlaın túrde elektrondyq ruqsat qujatyn resimdeýge múmkindik beredi.
Jasandy ıntellektke negizdelgen Echelon Alpha platformasynyń kómegimen tranzıttik áleýet boljanyp, marshrýttyq jeli modeldenedi jáne baǵyttar boıynsha suranys taldanady. Qazirgi tańda shamamen 30 perspektıvaly baǵyt aıqyndaldy.
Temirjol salasynda jyljymaly quramdy qashyqtan dıagnostıkalaý úshin KinetiX júıesi engizilip jatyr. Ony qoldaný esebinen stansada tehnıkalyq baıqaý ýaqyty 30%-ǵa jáne qolmen ólsheý kólemi 70%-ǵa qysqardy. Trip Optimizer jol profılin, quram massasyn jáne jyldamdyq shekteýlerin eskere otyryp, poıyzdy avtomattandyrylǵan júrgizý úshin qoldanylady.
Premer-mınıstr sondaı-aq mamandandyrylǵan jol-dıagnostıkalyq tehnıkany qarap shyǵyp, birqatar aıaqtalǵan ınfraqurylymdyq jobalar boıynsha baıandamalardy tyńdady.
Kólik mınıstrliginiń málimetinshe, sońǵy bes jylda sektordyń jalpy ónimi 3 esege ósip, 14 trln teńgeden asty. 5 myń shaqyrym temirjol joly jáne 5 myń shaqyrym avtomobıl joly jóndeldi, temirjol arqyly tranzıt kólemi 33 mln tonnaǵa jetti, al avtomobıl tasymalynyń kólemi 3 esege artty. Tsıfrlandyrýdy odan ári damytý nátıjesinde aldaǵy úsh jylda 2,2 myń shaqyrym jańa temirjol jelisin salý, tranzıt kólemin 77 mln tonnaǵa deıin ulǵaıtý, al teńiz porttarynyń ótkizý qýatyn 4 esege arttyrý josparlanyp otyr. 2040 jylǵa qaraı ishki avtomobıl tasymalynyń kólemi qazirgi 353 mln tonnadan 590 mln tonnaǵa deıin ósedi dep boljanyp otyr.
Premer-mınıstr kólik salasyn tsıfrlandyrýdyń mańyzdylyǵyn atap ótip, birqatar tapsyrma berdi.
— Prezıdent Qasym-Jomart Toqaev tsıfrlyq qyzmetter memleketin odan ári qurýdyń basymdyǵyn aıqyndady. Úkimet aldynda ekonomıkanyń barlyq salalaryna paıdaly jasandy ıntellekt sheshimderin engizý qarqynyn jedeldetý mindeti tur. Búgin tanystyrylǵan kólik salasyn tehnologııalyq transformatsııalaý jobalaryn qysqa merzimde búkil el boıynsha aýqymdy túrde engizýdi tapsyramyn, - dedi Oljas Bektenov.
Premer-mınıstr qaýipsizdikti arttyrý, merzimderdi qysqartý jáne shyǵyndardy ońtaılandyrý maqsatynda Kólik jáne aralas salalardyń aqparattyq júıelerin ıntegratsııalaý boıynsha da tapsyrmalar berdi.
Aıta keteıik, Astana polıtsııasy 24 kólikti aýktsıonda satpaqshy.
