Oljas Bektenov kólik salasyndaǵy iri ınvestıtsııalyq jobalar boıynsha keńes ótkizdi

ASTANA. KAZINFORM – Onda Qaýipsizdik Keńesi otyrysynda aıtylǵan Prezıdent tapsyrmalarynyń oryndalý barysy qaraldy. Bul týraly Úkimettiń baspasóz qyzmeti habarlady.

Jıynda kólik mınıstriniń mindetin atqarýshy Maqsat Qalıaqparov, sondaı-aq «QTJ» UK» AQ basqarma tóraǵasy Nurlan Saýranbaev, «QazAvtoJol» UK» AQ basqarma tóraǵasy Darhan Imanashev baıandama jasady.

Kólik mınıstrliginiń derekteri boıynsha 2025 jylǵa qaraı 13 myń shaqyrym avtojol, 6,1 myń shaqyrym temir jol jumysymen qamtylǵan jáne 6 áýejaıdy jańǵyrtylyp, salynyp jatyr. Sonymen qatar sý kóligi salasynda 2 joba júzege asyrylyp jatyr.

Temirjol kóligi salasynda jalpy quny 2,3 trln teńge bolatyn bes iri joba: «Dostyq – Moıynty» ýchaskesiniń (836 km) ekinshi joldyń qurylysy, Almaty stansasynyń aınalma joly (75 km), «Darbaza – Maqtaaral» temir jol jelisiniń (152 km) qurylysy júzege asyrylyp jatyr. «Qyzyljar – Moıynty» ýchaskesinde jumystar bastaldy: QTJ derekteri boıynsha birinshi jartyjyldyqta aıaqtalady dep josparlanǵan. Sondaı-aq «Baqty – Aıagóz» (272 km) jobasy týraly aıtyldy. «Dostyq – Moıynty» jáne Almaty stansasy aınalma joly jobalary merziminen buryn oryndalyp jatyr.

Sonymen qatar jumys temirjol jelisiniń jekelegen ýchaskelerin qamtıdy. Memleket basshysynyń tapsyrmasyna sáıkes, 2029 jylǵa deıin jalpy 11 myń shaqyrym temir joldy jóndeýden ótkizý josparlansa, bıyl jalpy somasy 177 mlrd teńgege 1 480 shaqyrym jol jańǵyrtylady. Sonymen qatar 2025 jyly aıaqtalatyn 125 vokzal keshenin rekonstrýktsııalaý jumystary júrgiziledi.

Avtojol qurylysy salasynda bıyl 13 myń shaqyrymǵa jumys júrgizý josparlanyp otyr. Onyń ishinde 2,2 myń shaqyrymy – rekonstrýktsııalaý boıynsha jobalar, 6,6 myń shaqyrymy – jóndeý, sondaı-aq 4,2 myń shaqyrymy – jergilikti jelini jóndeý jumystary. Qazirgi ýaqytta 9 myń shaqyrym jol jańǵyrtylyp jatyr. Uzyndyǵy 1 083 shaqyrym bolatyn aýyspaly jobalardy rekonstrýktsııalaý jalǵasyp jatyr, onyń ishinde jyl sońyna deıin 847 shaqyrym jol jumystaryn aıaqtaý josparlanǵan.

Jańa jobalar qatarynda «Ortalyq – Batys» kúre jolynyń qurylysy bar. Ol Astanadan Aqtaý porty baǵytyndaǵy tranzıttik baǵyttardyń qashyqtyǵyn 889 shaqyrymǵa qysqartýǵa múmkindik beredi. Sondaı-aq «Aqtóbe – Ulǵaısyn» (234 km), «Qaraǵandy – Jezqazǵan» (572 km) ýchaskeleri boıynsha jumystar bastaldy.

Jıyn barysynda Premer-mınıstr jol jumystarynyń sapasy máselesin kóterdi. «QazAvtoJol» UK» AQ basqarma tóraǵasy Darhan Imanashev avtomattandyrylǵan ólsheý júıeleriniń (AÓJ) jumysy týraly baıandady. Qazirgi ýaqytta respýblıkalyq joldarda osyndaı 27 keshen jumys isteıdi. 2025 jylǵa taǵy 25 AÓJ ornatý josparlanǵan, 2026 jyly olardyń jalpy sany 126 birlikke deıin jetkiziledi.

Arnaıy datchıkter kómegimen avtomattandyrylǵan ólsheý júıeleri shamadan tys júktemeni anyqtaý jáne jol jamylǵysynyń buzylýyn boldyrmaý úshin kólik quraldarynyń ólshemderi týraly aqparatty jedel túrde jiberedi.

Avıatsııa salasynda Qatonqaraǵaı, Zaısan, Kendirlide úsh jańa áýejaı salý, sondaı-aq Arqalyq qalasyndaǵy áýejaıdy qalpyna keltirý jobalary júzege asyrylyp jatyr. Pavlodar jáne Balqash áýe aılaqtarynda ınfraqurylym jańǵyrtylyp jatyr.

Sý kóligi salasynda Aqtaý portyn tereńdetý jumystaryn bastaý osy jyldyń shilde aıynda josparlanyp otyr. Sonymen qatar 2025 jyly saýda flotyn damytý aıasynda 8 birlik keme, onyń ishinde 6 qurǵaq júk kemesi jáne 2 parom satyp alynady.

Premer-mınıstr josparlanǵan barlyq jobany keshendi ári júıeli túrde júzege asyrýdyń mańyzyn atap ótti.

– Kólik salasy sońǵy 5 aıda 24% ósimdi kórsetti. Kólik energetıkalyq jáne basqa ınfraqurylymmen birge kez kelgen ekonomıkalyq damýdyń negizi sanalady. Nelikten Prezıdent pen Úkimet bul máselemen aınalysyp jatyr: eger biz qazir ınvestıtsııa salmasaq, onda uzaqmerzimdi ekonomıkalyq ósý bolmaıdy. Biz barlyq qajetti resýrsty bólemiz. Barlyq salalyq qurylymnyń mindeti – atalǵan qarajatty maqsatsyz paıdalanbaı jáne barlyq nysandy ýaqytynda tapsyrý. Barlyq nysan osy jyldyń Ekonomıkalyq ósý josparyna engizilgen. Bul qysqamerzimdi nátıjege qatysty jáne tutastaı alǵanda – bul aldaǵy 10 jyldaǵy turaqty ekonomıkalyq ósýdiń negizi, - dep atap ótti Oljas Bektenov.

Jıyn sońynda Kólik mınıstrligine, «Samuryq-Qazyna» qoryna jáne ózge de jaýapty uıymdarǵa birqatar tapsyrma berildi.

Kólik-logıstıkalyq ınfraqurylymdy damytýǵa $35 mlrd ınvestıtsııalandy.