Oljas Bektenov Kókshetaýdaǵy qazandyqtyń jaǵdaıyn tekserdi
KÓKShETAÝ. KAZINFORM – Premer-Mınıstr Oljas Bektenov Aqmola oblysyna jumys sapary barysynda jylytý maýsymyna daıyndyq josparymen jáne ınjenerlik qurylystardyń, atap aıtqanda, Kókshetaý qalasynyń №2 aýdandyq qazandyǵynyń jaı-kúıimen tanysty.
Úkimet basshysyna Kókshetaý qalasynyń ákimi Baýyrjan Ǵaısa energetıka kesheni ınfraqurylymynyń jaǵdaıy týraly baıandady.
Qazirgi tańda qaladaǵy jylý jelileriniń tozý deńgeıi 43%-dy quraıdy. Jylytý maýsymyna daıyndyq aıasynda 6 km kommýnıkatsııany jóndeý josparlanǵan, bul jyl qorytyndysy boıynsha kórsetkishti 41%-ǵa deıin tómendetýge múmkindik beredi. Qalany «Kókshetaý Jylý» memlekettik kommýnaldyq kásiporny jylýmen qamtamasyz etip otyr. Uıym balansynda 4 qazandyq bar.
Bıyl Úkimet qaýlysyna sáıkes, eki jylý kózin – №1 jáne №2 aýdandyq qazandyqtardy jóndeýge rezervten 816 mln teńge bólindi. Jazǵy ýaqytta nysandarda qazandyq agregattarynyń, konvektıvtik bólik paketteriniń, qyzdyrý betteriniń jáne shıki kómir býnkerleriniń aqaýlaryn joıý jumystaryn júrgizý josparlanyp otyr.
Oljas Bektenov №2 qazandyqtyń jaǵdaıyn tekserdi. Nysan 1998 jyly paıdalanýǵa berilgen, qazirgi ýaqytta 56 myń abonentti jylýmen qamtamasyz etip otyr. Qazandyqtyń óndiristik shekti qýaty saǵatyna 300 Gkal-ǵa jetedi. Jóndeý jumystaryn júrgizý apattyq jaǵdaıdy azaıtýǵa jáne jylytý maýsymynda halyqty jylýmen úzdiksiz qamtamasyz etýge múmkindik beredi.
«Osyǵan deıin atap ótkenimdeı, qystyń kózi qyraýda qıyndyqty boldyrmaý úshin jaz aılarynda barlyq kúsh-jigerdi jumsaý kerek. Memleket basshysy kommýnaldyq-energetıkalyq sektordy jańǵyrtý jumystaryn jedeldetýdi tapsyrdy. Sapaly ári úzdiksiz jylý berýdi qamtamasyz etý – bizdiń basty mindetterimizdiń biri. Qarajat bólindi. Júktelgen jumysqa barynsha jaýapkershilikpen qaraý kerek. Biz ótken tájirıbeni eskerip, jiberilgen qatelikterden sabaq alyp, erte bastan belsendi áreket etýimiz kerek», - dep atap ótti Oljas Bektenov.
Búginde Kókshetaýda qalanyń jylý jáne elektr energııasyna degen ósip kele jatqan qajettilikterin qamtamasyz etetin JEO salý jobasy pysyqtalyp jatyr. Onyń jylý qýaty saǵatyna 520 Gkal, elektr qýaty 240 MVt-ty quraıtyn bolady dep josparlanyp otyr.
