Oljas Bektenov Kókshetaý temirjol vokzalyn jańǵyrtý barysyn tekserdi
ASTANA. KAZINFORM — Premer-mınıstr Oljas Bektenov Aqmola oblysyna jumys sapary aıasynda Kókshetaý qalasynyń temirjol vokzalyn rekonstrýktsııalaý jumystarymen tanysty, dep habarlaıdy Úkimettiń baspasóz qyzmeti.
Sonymen qatar, Úkimet basshysy Prezıdenttiń Joldaýda jáne Úkimettiń keńeıtilgen otyrysynda bergen kólik ınfraqurylymyn jańǵyrtý jónindegi tapsyrmalarynyń júzege asyrylý barysyn tekserdi. Oljas Bektenov Memleket basshysy elimizdiń kólik júıesin damytý máselelerine erekshe kóńil bólip otyrǵanyn atap ótti.
Qazaqstanda zamanaýı tehnologııalarǵa, azamattar úshin qaýipsizdik pen yńǵaılylyqqa basa nazar aýdara otyryp, temirjol vokzaldaryn júıeli jańǵyrtý jumystary júrgizilip jatyr. Vokzal keshenderin ótkizý qabiletin keńeıtý jáne jolaýshylarǵa qyzmet kórsetý sapasyn arttyrý boıynsha aýqymdy jańartý sharalary qabyldanyp jatyr.
«Qazaqstan temir joly» UK» AQ qurylys jónindegi basqarýshy dırektory Marat Esqalıev Premer-mınıstrge Kókshetaý qalasynyń temirjol vokzalyn jańǵyrtý barysy týraly baıandady. Ǵımarat 1981 jyly salynǵan, sońǵy kúrdeli jóndeý jumystary 20 jyl buryn júrgizilgen. Qurylys-montajdaý jumystarynyń kólemi 93%-ǵa oryndalyp, ishki árleý, jabdyqty montajdaý jáne jabdyqtardy ornatý júrgizilip jatyr. Negizgi mindet — ǵımarattyń tarıhı kelbetin saqtaı otyryp, zamanaýı materıaldardy paıdalaný, ınjenerlik jelilerdi aýystyrý jáne tehnıkalyq qurylǵylardy jańartý. Inklıýzıvti ortany qalyptastyrý úshin arnaıy jabdyqtar ornatýǵa erekshe nazar aýdarylady.
Jalpy, Aqmola oblysy boıynsha 16 nysan jańǵyrtyldy, bul — respýblıkadaǵy eń joǵary kórsetkish. Onyń jeteýine rekonstrýktsııa júrgizilip jatyr, olardyń daıyndyǵy búginde 90%-ǵa jetken. Taǵy toǵyz vokzal tolyq buzylyp, ornyna jańa ǵımarattar salý josparlanǵan. Kókshetaýmen qatar Atbasar, Makınka, Býrabaı, Aqkól, Ereımentaý, Esil, Jaqsy, Jaltyr, Derjavınsk, Shortandy jáne taǵy basqa da eldi meken stansalarynda jumystar júrgizilip jatyr.
Qazaqstan boıynsha vokzal keshenderi men temirjol ınfraqurylymyn jańǵyrtý boıynsha jumystardyń joǵary qarqyny Aqmola, Almaty, Atyraý, Batys Qazaqstan, Qaraǵandy, Qostanaı, Qyzylorda, Pavlodar, Soltústik Qazaqstan, Túrkistan, Jambyl, Jetisý jáne Ulytaý oblystarynda tirkelgen. Budan bólek, rekonstrýktsııalaý Astana-1 jáne Almaty-1 vokzaldary sııaqty iri toraptarda da júrgizilýde. Jyl sońyna deıin elimiz boıynsha jalpy 124 temirjol vokzaly jańǵyrtylady.
Premer-mınıstr Kólik mınıstrligine ákimdik jáne QTJ-men birlesip, eldi mekenderdiń turǵyndary men qonaqtary qajettilikterin eskere otyryp, qurylys jumystarynyń merzimderi men sapasyna qatań baqylaýdy qamtamasyz etýdi tapsyrdy.
Osyǵan deıin Oljas Bektenov sý tasqynyna daıyndyq boıynsha respýblıkalyq jedel shtab otyrysyn ótkizgenin jazǵan bolatynbyz.