Oljas Bektenov kókónis baǵasynyń negizsiz ósýine jol bermeýdi tapsyrdy
ASTANA. KAZINFORM – Kókónistiń artylǵan ónimin eksportqa shyǵarý kerek. Bul týraly Úkimet otyrysynda Premer-mınıstr Oljas Bektenov aıtty.
- Qazirgi tańda basty mindet – egin oraǵyn ýaqtyly aıaqtap, jınalǵan ónimdi saqtap qalý. Elevatorlar men astyq qoımalarynyń, sondaı-aq bıdaıdy keptirýge arnalǵan qýattardyń tolyq daıyndyǵyn qamtamasyz etý qajet. Sondaı-aq astyqty ysyrap qylmaı, sapasyn joǵaltyp almaý úshin barlyq tıisti sharalardy qabyldaý kerek. Kún raıy jumys qarqynyna, ónimniń sapasy men kólemine áser etpeýge tıis. Ekologııa mınıstrligi dıqandarǵa aýa raıy boljamy týraly málimetti egin oraǵy aıaqtalǵansha kúndelikti berip tursyn. Jeńildikti dızel otynynyń qoljetimdiligine basa nazar aýdarý qajet, - dedi Premer-mınıstr.
Osy oraıda Úkimet basshysy Energetıka mınıstrliginne óńir ákimdikterimen birlesip, egin jınaý naýqany men astyqty keptirý jumystary tolyq aıaqtalǵansha janarmaıdyń úzdiksiz jetkizilýin, sondaı-aq otyn qoryn baqylaýda ustaýdy tapsyrdy.
- Taǵy bir mańyzdy másele – aýyl sharýashylyǵy ónimderiniń eksportyn - qalyptasqan qarqynmen jalǵastyrý. Josparlanyp otyrǵan ónim kólemi ishki qajettilikti qamtamasyz etýge de, dástúrli kólemdegi ónimdi eksportqa jóneltýge de jetkilikti. Qysqy jáne kóktemgi kezeńderge kókónis, ásirese kartop qoryn daıyndap alý basym baǵyt bolyp qala beredi. Egin oraǵy kezinde qajetti kólemderdi aldyn ala kelisimshart arqyly ýaqtyly satyp alyp, saqtaýǵa qoıý kerek. Óńir ákimdikteri bul máseleni baqylaýda ustap, maýsymaralyq kezeńde áleýmettik mańyzy bar kókónis ónimderiniń tapshylyǵyna jáne baǵanyń negizsiz ósýine jol bermeýge tıis. Bul rette ónimniń artylǵan kólemin eksportqa baǵyttaý qajet. Saýda jáne Kólik mınıstrlikteri sharýalarǵa ónimdi ótkizý naryqtaryn izdestirýge jáne satýǵa járdemdesýge tıis, - dedi Oljass Bektenov.
Premer-mınıstr el ishinde aýyl sharýashylyǵy shıkizatyn qaıta óńdeý úlesin kezeń-kezeńimen arttyrý mańyzdy ekenin aıtty.
- Biz tereń óńdeý óndirisin damytyp, keıinnen qosylǵan quny joǵary daıyn ónimdi syrtqy naryqtarǵa shyǵarýǵa tıispiz. Jambyl oblysynda júgerini tereń óńdeıtin zamanaýı zaýyttyń ashylýy atalǵan baǵyttaǵy mańyzdy qadamdardyń birine aınaldy. Mundaı óndiristiń iske qosylýy sharýalardy yntalandyra túsip, otandyq shıkizatqa kepildi suranys qalyptastyrady. Buǵan qosa, bıyl júgeri alqaptarynyń kólemi 60%-ǵa ulǵaıtyldy. Tıimdi ınvestıtsııalyq jobalardy iske qosý arqyly salany odan ári damytyp, onyń básekege qabilettiligin arttyrýǵa jáne óńdeý salasyn sapalyq turǵydan jańa deńgeıge kóterýge bolady, - dedi ol.
Sonymen qatar Úkimet basshysy eginshilerdi zamanaýı sý únemdeý tehnologııalaryna kóshýge yntalandyrý tájirıbesin jalǵastyrý qajettigin aıtty.
