Oljas Bektenov Qyzylorda energetıkalyq ınfraqurylymynyń jylý berý maýsymyna daıyndyǵyn tekserdi
QYZYLORDA. KAZINFORM – Aldaǵy jylytý maýsymyna daıyndyq aıasynda Premer-Mınıstr Oljas Bektenov Qyzylorda oblysynda jańa JEO qurylysynyń barysymen tanysty. Sondaı-aq aldaǵy ýaqytta shyny klasteri qurylatyn tabaq shyny óndiretin ınvestıtsııalyq jobaǵa baryp, Memleket basshysynyń óńdeý ónerkásibiniń úlesin ulǵaıtý jónindegi tapsyrmasynyń oryndalýyn tekserdi. Bul týraly Úkimettiń baspasóz qyzmeti habarlady.
Óńir turǵyndaryn 1964 jyly paıdalanýǵa berilgen JEO jylýmen qamtamasyz etip otyr. Búgingi tańda jabdyqtyń tozýy 75%-dy quraıdy. Ortalyqtandyrylǵan jylýmen jabdyqtaý júıesine 2 949 nysan, onyń ishinde 808 kóppáterli úı qosylǵan. Bıyl osy obektilerdi ystyq sýmen qamtamasyz etý úshin Prezıdent qoıǵan mindetti iske asyrý sheńberinde Úkimet rezervinen 11 mlrd teńge, qalalyq qazandyqtardy jóndeýge taǵy 2 mlrd teńge bólindi. Sonymen qatar jylý jelilerin jańǵyrtýǵa respýblıkalyq bıýdjetten 6 mlrd teńge baǵyttaldy. Qabyldanyp jatqan sharalar jylý trassalarynyń tozýyn 42%-ǵa deıin tómendetýge múmkindik beredi.
Sondaı-aq Premer-Mınıstrge jylý qýaty saǵatyna 277 Gkal bolatyn jańa JEO qurylysynyń qarqyny týraly baıandaldy. Qazirgi ýaqytta jer qazý jumystary aıaqtaldy, jabdyqty ornatýǵa negiz qalanýda – alańǵa 600-ge jýyq adam jáne 60 birlik tehnıka jumyldyryldy. Qurylys jumystary josparǵa sáıkes júrip jatyr. Nysandy 2025 jyly paıdalanýǵa berý josparlanǵan. Qazirgi tańda ınvestor jobany iske asyrýǵa 70 mlrd teńgeden astam ınvestıtsııa saldy. Oljas Bektenov el ekonomıkasynyń belsendi damýyna jáne ónerkásiptik kásiporyndardyń iske qosylýyna baılanysty qosymsha energııa qýaty qajet ekenin atap ótti.
«Jańa JEO qurylysy Memleket basshysynyń erekshe baqylaýynda. Onyń iske qosylýy ońtústik óńirlerdegi elektr energııasynyń júktemesin turaqtandyrýǵa jáne tutastaı alǵanda elimizdiń energetıkalyq qaýipsizdigin nyǵaıtýǵa oń áserin tıgizedi», - dep atap ótti Premer-Mınıstr.
Qyzylorda oblysynyń ákimdigine gaz jetkizýshi qubyr men JEO qurylysyn ýaqytyly aıaqtaý, sondaı-aq barlyq obektilerdiń jylý berý maýsymyna daıyndyǵyn qamtamasyz etý jóninde tapsyrma berildi.
Qyzylorda oblysy óńdeý ónerkásibinde óndirilgen ónim kórsetkishiniń ósý qarqyny boıynsha kósh bastap tur. Oblys ákiminiń orynbasary Ardaq Zebeshev Premer-Mınıstrge óńirdegi ónerkásiptiń damýy týraly baıandady. 2024 jyldyń 5 aıynda ekonomıkanyń osy sektory 6,3% ósim kórsetti, ınvestıtsııalar kólemi 40%-ǵa ósti, onyń 80% – jeke salymdar. 2024-2028 jyldar aralyǵynda 8,4 myń jumys ornyn qurýmen jalpy somasy 1,1 trln teńgege 76 jobany iske asyrý kózdelgen. Osy jyldyń ózinde 32,4 mlrd teńge somasyna 15 joba iske qosylmaq. Shyny zaýytynyń iske qosylýy damýǵa aıryqsha serpin berdi, onda qazirgi tańda shyny klasterin qurý jumystary bastaldy. Kásiporyn jumys istegen ýaqyt ishinde 27,3 mlrd teńge somasyna 20,8 mln m2 shyny óndirildi. Búginde kásiporyn $15 mln kólemindegi óz qarajatyna qýaty jylyna 5 mln m2 bolatyn energııa únemdeıtin shyny shyǵaratyn jańa jelini iske qosty.
Oljas Bektenov Qazaqstan ekonomıkasy úshin mańyzdy jobalarǵa qarajat salýǵa daıyn ınvestorlarǵa qoldaý kórsetý qajettigin atap ótti.
Jumys sapary aıasynda jol-kólik ınfraqurylymyn damytý máselesine nazar aýdaryldy. Atap aıtqanda, «Qyzylorda – Jezqazǵan», «Qyzylorda – Úshqudyq» avtomobıl joldaryn salý jáne «Qyzylorda – Aqtóbe» avtomagıstralin rekonstrýktsııalaý jobalary bar. Kólik mınıstrligine qajetti jumystardy júrgizýge jáne jobalardy ýaqytyly aıaqtaýǵa tıisti qujattardy resimdeý jóninde tapsyrmalar berildi.
