Oljas Bektenov Qyzylorda oblysynyń aktıvine óńirdiń jańa ákimin tanystyrdy
ASTANA. KAZINFORM – Memleket basshysynyń tapsyrmasy boıynsha Oljas Bektenov Qyzylorda oblysynyń aktıvine óńirdiń jańa ákimin tanystyrdy. Bul týraly úkimettiń baspasóz qyzmeti habarlady.
Prezıdent Qasym-Jomart Toqaevtyń tapsyrmasy boıynsha Premer-mınıstr Qyzylorda oblysy máslıhaty depýtattarynyń jınalysyna qatysty.
Jıyn barysynda Memleket basshysynyń Qyzylorda oblysynyń ákimi laýazymyna eki kandıdatty: Ardaq Zebeshev jáne Murat Ergeshbaevty usyný týraly haty oqyldy. Ashyq daýys berý nátıjesi boıynsha 81% depýtat Murat Ergeshbaevtyń kandıdatýrasyn qoldady. 19% depýtat Ardaq Zebeshevke daýys berdi. QR Prezıdentiniń tıisti Jarlyǵymen Qyzylorda oblysynyń ákimi bolyp Murat Ergeshbaev taǵaıyndaldy.
Oljas Bektenov oblys aktıvimen kezdesýde Memleket basshysynyń atynan Nurlybek Nálibaevqa óńirdiń áleýmettik-ekonomıkalyq damýyna jáne azamattardyń ómir súrý sapasyn jaqsartýǵa qosqan eleýli úlesi úshin alǵys bildirdi. Jalpy óńirlik ónim kólemi 4 jylda 2 esege artyp, 3,7 trln teńgege jetti. Investıtsııa tartý, áleýmettik mańyzdy ınfraqurylymdy salý jáne jańǵyrtý, abattandyrý jáne basqa da salalar boıynsha jumystar belsendi júrgizilýde.
Premer-mınıstr oblys aktıvine óńirdiń jańa ákimi Murat Ergeshbaevty tanystyryp, Prezıdenttiń Qyzylorda oblysy basshylyǵynyń aldyna birqatar basym mindet qoıǵanyn atap ótti. Bul – birinshi kezekte Memleket basshysynyń bastamasymen elimizdi ári qaraı jańǵyrtýǵa baǵyttalǵan, halyqtyń ál-aýqatyn jaqsartý, ekonomıka salalaryn ártaraptandyrý jáne tsıfrlandyrý, ınvestıtsııa tartý, áleýmettik ınfraqurylymdy damytý syndy ózge de basym baǵyttarǵa baǵdarlanǵan konstıtýtsııalyq reformany júzege asyrý.
– Prezıdenttiń bastamasymen elimizde mańyzdy saıası, áleýmettik-ekonomıkalyq reformalar júrgizilýde. "Ádiletti Qazaqstan" tujyrymdamasynyń nátıjeli júzege asyrylýy osy otyrǵan bárimizge baılanysty ekenin aıtqym keledi. Memleket basshysy Qyzylorda oblysynyń damýyn únemi nazarda ustap keledi. Maqsattarǵa qol jetkizý úshin barlyq qurylym men qoǵam birlesip jumys isteýi qajet, - dep atap ótken Oljas Bektenov birqatar tapsyrma berdi.
Óńir basshylyǵy azamattardyń ómir súrý sapasyn jaqsartýǵa tikeleı áser etetin mańyzdy jobalardyń turaqty jumysyn qamtamasyz etýi kerek. Prezıdenttiń bastamasymen Qyzylorda qalasynda qýaty 240 MVt bolatyn jańa gaz JEO-sy salynyp, paıdalanýǵa berildi, ol halyqtyń elektr jáne jylý energııasyna degen suranysyn tolyǵymen jabýǵa múmkindik beredi. Іri energetıkalyq jobaǵa 215 mlrd teńge kóleminde ınvestıtsııa salyndy.
Sonymen qatar Qyzylorda qalasy ystyq sýmen qamtamasyz etildi, oǵan respýblıkalyq bıýdjetten 26 mlrd teńgeden astam qarjy bólindi. AÓK salasynda aýyl sharýashylyǵy daqyldary kólemin ońtaılandyrý jáne sý únemdeý tehnologııalaryn engizý mindetteriniń mańyzdylyǵy atap ótildi.
Kásipkerlik belsendilikti qoldaý arqyly shaǵyn jáne orta bıznesti (ShOB) damytýǵa jáne olardyń óńir ekonomıkasyndaǵy úlesin odan ári arttyrýǵa nazar aýdaryldy. Ótken jyldyń qorytyndysy boıynsha bul kórsetkish 24,7%-dy qurady.
Sondaı-aq taldaý jáne bıýdjet qarajatyn tıimdi jumsaý boıynsha tájirıbeni jalǵastyrý qajet. Qyzylorda oblysynda keıingi 4 jylda áleýmettik salada 100 mlrd teńgeden astam bıýdjet qarajatynyń tıimsiz jumsalýyna tosqaýyl qoıyldy. Únemdelgen qarjy halyqtyń ómir súrý sapasyn jaqsartýǵa jáne jańa ınfraqurylymdyq jobalardy júzege asyrýǵa baǵyttaldy.
