Oljas Bektenov Qyrǵyzstanmen shekaradaǵy ótkizý pýnktterin jańǵyrtý barysymen tanysty

ASTANA. KAZINFORM – Premer-Mınıstr Oljas Bektenov Jambyl oblysyna jumys sapary aıasynda Memleket basshysynyń kólik-logıstıka salasyn damytý maqsatynda shekaralyq ótkizý pýnkterin jańǵyrtý jóninde bergen tapsyrmasynyń oryndalý barysyn tekserdi, dep habarlaıdy Úkimettiń baspasóz qyzmeti.

Úkimet basshysy Qyrǵyzstanmen shekarada ornalasqan «Qordaı» jáne «Qarasý» avtokólik ótkizý beketterinde bolyp, ınfraqurylymmen, ótkizý qabiletimen, týyndap otyrǵan máselelermen jáne odan ári damytý josparlarymen tanysty.

Kólik mınıstri Nurlan Saýranbaev pen QR UQK Shekara qyzmeti dırektorynyń orynbasarynyń ýaqytsha mindetin atqarýshy Ulan Abıkov ótkizý beketterindegi jaǵdaı, sondaı-aq Premer-Mınıstrdiń tapsyrmasy boıynsha júrgizilgen tekserýlerdiń qorytyndysy týraly baıandady.

Qazirgi ýaqytta EAEO elderimen shekarada 39 avtokólik ótkizý pýnkti bar. Olardyń ekeýinde jóndeý jumystary aıaqtalǵan, 10 pýnktte jańǵyrtý bastaldy. Jóndeý jumystarynyń bir bóligi Qazaqstan–Reseı shekarasynda júrgizilýde, aldaǵy ýaqytta basqa da ótkizý beketteri qamtylady.

«Qordaı» beketinde ótken rekonstrýktsııa nátıjesinde qozǵalys jolaqtary 4-ten 8-ge, tólqujattyq qadaǵalaý kabınalary 20-dan 40-qa deıin kóbeıdi. Nátıjesinde ótkizý qabileti jolaýshylar aǵyny boıynsha 4 ese, avtokólik boıynsha 2,7 ese artty. «Qarasý» beketinde bastalǵan jańǵyrtý jumystary táýliktik ótkizý qabiletin 700-den 2 myńnan astam kólikke deıin arttyrýǵa múmkindik beredi.

Premer-Mınıstr shekara nysandarynyń transshekaralyq yntymaqtastyqty damytýdyń jáne halyqaralyq jolaýshylar men júk tasymalyn qamtamasyz etýdiń mańyzdy bóligi ekenin atap ótti. Ol jóndeý jumystarynyń sapaly ári ýaqtyly oryndalýyn, rásimderdi jedeldetý úshin tsıfrlyq tehnologııalardy engizýdi jandandyrýdy, sondaı-aq azamattar men syrtqy ekonomıkalyq qyzmetke qatysýshylarǵa qolaıly jaǵdaı jasaýdy tapsyrdy.

Sapar barysynda «Batys Eýropa – Batys Qytaı» halyqaralyq dáliziniń quramynda taýarlardy saqtaý, óńdeý, shoǵyrlandyrý jáne ótkizý ortalyǵyna aınalatyn ındýstrııalyq-saýda-logıstıkalyq keshen salý jobasy tanystyryldy.

Oljas Bektenov qurylys merziminiń sozylyp ketýine baılanysty syn aıtyp, qysqa merzimde tıisti sharalar qabyldaýdy jáne jumys qarqyny men sapasyn qatań baqylaýdy tapsyrdy.

Aıta keteıik, Qyrǵyzstan Tájikstanmen shekarasyn qorshaýǵa kiristi.