Oljas Bektenov QHR shekarasyndaǵy kólik-logıstıka salasy ahýalymen tanysty
ASTANA. KAZINFORM – Premer-Mınıstr Oljas Bektenov Jetisý oblysyna jumys sapary barysynda óńir ekonomıkasynyń 7%-yn quraıtyn kólik-logıstıka salasynyń damýymen tanysty. Birinshi jartyjyldyq qorytyndysy boıynsha oblysta avtokólikpen júk tasymaldaýdyń jyl basyndaǵy 55,7%-dan 6 aıda 101,1%-ǵa deıin ósý úrdisi baıqalady. Bul týraly QR Úkimetiniń baspasóz qyzmeti málim etti.
Nur Zholy Customs Service halyqaralyq kólik-logıstıka ortalyǵynyń aýmaǵynda Úkimet basshysy Cross-Docking tehnologııasyn qoldaný arqyly kólik quraldaryn esepke alýdyń avtomattandyrylǵan júıesimen tanysty.
«Ortalyqtyń jumysy tranzıtti jeńildetý ári jedeldetý úshin jańa tehnologııalardy engizý arqyly júk aınalymyn arttyrýǵa baǵyttalǵan. Bul nysan ekonomıkany monopolııadan aryltý aıasynda memleketke qaıtaryldy. Bıylǵy qańtar aıynda ortalyq aýmaǵynda Dostyk Customs Service ýaqytsha saqtaý qoımasy ashyldy, ol „Alakól“ avtokólik ótkizý beketinde júkterdi tıimdi ári jyldam kedendik óńdeýge jáne ótkizý qabiletin arttyrýǵa yqpal etedi. Búgingi tańda ortalyqtyń ótkizý qabileti táýligine 150-200 avtokólikti, qoımanyń ortasha táýliktik júk aınalymy 200-250 tonnany quraıdy. Júk aınalymynyń áleýeti — jylyna 1,2 mln tonna taýar», — delingen habarlamada.
Sondaı-aq Dostyq kentinde túrli tabandy temir joldarmen jabdyqtalǵan Dostyk TransTerminal kópfýnktsıonaldy júkterdi aýystyryp tıeý termınaly tekserildi.
«Úkimet basshysyna 2021 jyldyń 7 aıynda 66,2 myń JFB konteıneri (jıyrma fýttyq balamasy) tıelse, bıyl osy kezeńde 101 myń konteıner qaıta tıelip, 35%-ǵa óskeni baıandaldy. Jalpy, bıylǵy boljam 180 myń JFB konteınerin quraıdy. Dostyk TransTerminal kópfýnktsıonaldy júkterdi aýystyryp tıeý termınalynyń qosymsha alańyn jáne 50 jumys ornyn qura otyryp, 3,2 mlrd teńgege qýattylyǵy jylyna 160 myń JFB konteınerin quraıtyn mamandandyrylǵan tehnıka salý jobasyn iske asyrý josparlanǵan», — dep habarlady Úkimettiń baspasóz qyzmetinen.
Sondaı-aq Premer-Mınıstr «Alakól» keden beketiniń qyzmetimen, júk kólik quraldaryn tasymaldaýdyń qoldanystaǵy shemasymen jáne ótkizý beketin jańǵyrtý barysymen tanysty. Jańǵyrtý sheńberinde jeke tulǵalardy, júkti, taýarlar men kólik quraldaryn baqylaý, sondaı-aq baılanys, derekter berý jáne almasý tehnologııalary engiziletin bolady. Jalpy, ótkizý qabileti táýligine 200-250 júk kóliginen 1000-ǵa deıin ulǵaıtylady. Nysan bıyl qyrkúıek aıynyń sońynda paıdalanýǵa beriledi dep josparlanyp otyr.
Úkimet basshysy kólik-logıstıka áleýetin odan ári damytýdy jáne ósip kele jatqan júk aǵynyn qanaǵattandyrý úshin ınfraqurylym qýatyn arttyrýdy baqylaýda ustaýdy tapsyrdy. Ótken jyly Qytaı men Qazaqstan arasyndaǵy ekijaqty taýar aınalymy 30%-ǵa artyp, $31,5 mlrd-qa jetti. Kedendik rásimderdi jeńildetý Qazaqstannyń óńirdegi negizgi tranzıttik kólik dálizi retindegi pozıtsııasyn odan ári nyǵaıtýǵa serpin beredi. Tıimdiligi dáleldengen Cross-Docking sııaqty zamanaýı tsıfrlyq sheshimderdi basqa óńirlerde de iske qosý kerek ekeni atap ótildi.
«Memleket basshysy atap ótkendeı, ornyqty ekonomıkalyq ósimdi qamtamasyz etý úshin básekelestik artyqshylyqtarymyzdy paıdalaný mańyzdy. Bizde Qazaqstandy Eýrazııanyń negizgi tranzıttik habtarynyń birine aınaldyrýǵa barlyq jaǵdaı jasalǵan. Biz Qazaqstannyń teńizge shyǵa almaıtynyn jıi aıtamyz, alaıda Qytaı biz úshin muhıt ispettes. Osy baǵytta kúsh-jigerimizdi biriktirip, tutas tranzıttik qozǵalysty qamtamasyz etýimiz kerek. Biz tranzıttik dálizdi óte belsendi damytyp jatyrmyz: Ázerbaıjan, Grýzııadaǵy áriptesterimizben kelisimder bar. Ári qaraı da jumys isteımiz. „Dostyq — Moıynty“ temirjol qatynasyn keńeıtý damýǵa jańa serpin beredi. Biz bıznestiń keńeıtýge daıyn ekenin kórip otyrmyz, áli de qarajat salýǵa nıet etýshiler bar. Munyń bári tranzıttik júk kólemin birneshe ese arttyrýǵa múmkindik beredi», — dep atap ótti Oljas Bektenov.
