Oljas Bektenov QHR Memlekettik keńesiniń Premerimen kezdesip, birqatar máseleni talqylady
ASTANA.KAZINFORM - Premer-mınıstrOljas Bektenovtiń Qytaı Halyq Respýblıkasyna jumys sapary aıasynda QHR Memlekettik keńesiniń Premeri Lı Tsıanmen kezdesý ótti. Bul týraly Úkimettiń baspasóz qyzmeti habarlady.
Taraptar joǵary deńgeıde qol jetkizilgen ýaǵdalastyqtardyń júzege asyrylý barysyn, qazaq-qytaı yntymaqtastyǵyn odan ári nyǵaıtý perspektıvalaryn, onyń ishinde saýdany damytý, ınvestıtsııalyq ózara is-qımyldy keńeıtý, AÓK, kólik-logıstıka jáne basqa da salalardaǵy yntymaqtastyq máselelerin talqylady.
QR Premer-mınıstri Qazaqstan damýdyń jańa kezeńine qadam basqanyn atap ótti. Jalpyulttyq referendým qorytyndysy boıynsha qabyldanǵan Konstıtýtsııada Memleket basshysy Qasym-Jomart Toqaevtyń Ádiletti ári Progressıvti Qazaqstan qurýǵa baǵyttalǵan bastamalary bekitilgen. Atap aıtqanda, «Zań jáne Tártip» qaǵıdaty aıasynda sheteldik ınvestorlardyń quqyqtary men zańdy múddelerin qorǵaý, ınvestıtsııalyq ortanyń turaqtylyǵyn qamtamasyz etý jáne zań ústemdigi kepildikterin arttyrý jónindegi sharalar kúsheıtildi.
- Qazaqstan men Qytaıdy ózara qurmet pen qoldaýǵa negizdelgen dostyq jáne yntymaqtastyq baılanystyrady. Búginde ekijaqty qatynastar máńgilik ári jan-jaqty strategııalyq seriktestik rýhynda damyp, jańa «altyn otyzjyldyq» kezeńine qadam basty. Memleketterimizdiń kóshbasshylary Qasym-Jomart Kemeluly Toqaev pen Sı Tszınpın arasyndaǵy berik senimge negizdelgen syndarly dıalog seriktestiktiń úlgili modeline aınalǵan memleketaralyq qatynastardyń ornyqty damýynyń negizgi qozǵaýshy kúshi bolyp otyr, - dep atap ótti Qazaqstan Premer-mınıstri Oljas Bektenov.
QHR Memlekettik keńesiniń Premeri Lı Tsıan strategııalyq ózara is-qımyldyń joǵary deńgeıin atap ótip, ekijaqty qatynastardy odan ári nyǵaıtýǵa daıyn ekenin jetkizdi.
- Keıingi jyldary eki el arasynda joǵary deńgeıde tyǵyz baılanys ornady, QHR Tóraǵasy Sı Tszınpın men Qazaqstan Prezıdenti Qasym-Jomart Toqaev jyl saıyn kezdesedi. Búginde Qazaqstan men Qytaı arasyndaǵy jan-jaqty strategııalyq seriktestik ózara qoldaý men tatý kórshilik úlgisine aınalyp, udaıy tereńdeı túsýde. Qazirgi halyqaralyq jaǵdaıda eki el senimdi seriktester retinde ortaq damýdyń ıgiligi jolynda birlesip jumys siteý úshin ózara úılestirýdi nyǵaıtýy qajet. Qytaı tarapy saıası ózara senimdi nyǵaıtýǵa, damý strategııalaryn úılestirýge jáne eki el halqynyń ıgiligi úshin kópqyrly yntymaqtastyqty keńeıtýge baǵyttalǵan birlesken jumysty jalǵastyrýǵa daıyn, - dep atap ótti Lı Tsıan.
Qytaı Qazaqstannyń negizgi saýda jáne ınvestıtsııalyq seriktesteriniń biri sanalady. 2025 jyldyń qorytyndysy boıynsha ózara saýda kólemi $48 mlrd-tan asty, QHR-dan tartylǵan tikeleı ınvestıtsııa kólemi – $2,8 mlrd.
Agroónerkásip keshendegi ekijaqty saýda kórsetkishteri turaqty ósim kórsetip jatyr. 2025 jyldyń qorytyndysyna sáıkes, atalǵan baǵyt boıynsha taýar aınalymy 36%-ǵa ósip, $1,9 mlrd-tan asty. Kólik-logıstıka salasynda Qazaqstan Qytaı men Eýropa arasyndaǵy qurlyq tasymalynda sheshýshi ról atqarady: respýblıka aýmaǵy arqyly júk aǵynynyń 85%-dan astamy ótedi. 2025 jyldyń qorytyndysy boıynsha Qazaqstan men QHR arasyndaǵy temirjol tasymaly 11% ósimmen 35,6 mln tonnaǵa jetti.
Dalıan qalasynda Premer-mınıstr «Bir beldeý, bir jol» bastamasyna arnalǵan sessııaǵa qatysty. Otyrysta sóz sóılegen Oljas Bektenov Eýrazııa júreginde ornalasqan Qazaqstan shamamen 1,7 mlrd tutynýshysy bar naryqqa qoljetimdilikti qamtamasyz etetinin atap ótti. Sońǵy 7 jylda kólik-tranzıt ınfraqurylymyn damytýǵa $35 mlrd-tan astam qarjy jumsaldy, Aqtaýdaǵy konteınerlik hab, Sıan qurǵaq porty, «Dostyq – Moıynty» temirjolynyń ekinshi joldary sekildi iri jobalar júzege asyryldy.
«Bir beldeý – bir jol» bastamasyn odan ári damytýdyń bes basym baǵytyna nazar aýdaryldy.. Olar: ınfraqurylymdyq ózara baılanysty nyǵaıtý, tsıfrlyq orta dálizdi qalyptastyrý, «jasyl» kún tártibin ilgeriletý, sondaı-aq saýdany, ınvestıtsııalardy jáne qarjy tetikterin keńeıtý.
- Bir beldeý, bir jol" bastamasy ózara baılanystardyń keńeıýi jańa múmkindikterge jol ashatynyn aıqyn kórsetti. Búginde Qazaqstan men Qytaı osynyń jarqyn mysaly bolyp otyr. Jibek joly árdaıym ashyqtyq, senim jáne kúsh-jiger biriktirýge daıyn bolýdyń arqasynda órkendep keledi. Qazaqstan osy qaǵıdattarǵa berik. Biz ózimizdi Qytaıdyń senimdi seriktesi ári óńirlerdi baılanystyratyn mańyzdy kópir retinde kóremiz. Sonymen qatar osy kózqarasty bólisetin barlyq seriktespen ózara tıimdi ári aýqymdy jobalardy júzege asyrýǵa ashyqpyz. Túptep kelgende, ózara baılanys ınfraqurylym ǵana emes, bul – adamdardyń ál-aýqaty men ortaq progress, - dep atap ótti Qazaqstan Premer-mınıstri Oljas Bektenov.
Sessııa jumysyna sondaı-aq birqatar eldiń úkimet basshylary, saraptamalyq jáne ǵylymı qoǵamdastyq ókilderi qatysty. «Bir beldeý, bir jol» bastamasyn odan ári ilgeriletý perspektıvalary, onyń qatysýshy elderdiń ekonomıkalyq damýyna áseri, saýda baǵyttary men jetkizý tizbekterin qaıta qurý, tsıfrlyq ınfraqurylym máseleleri jáne bastamanyń 2040 jylǵa deıingi keleshegi talqylandy.
Aıta keteıik, Qazaqstan men EO arasyndaǵy saýda kólemi 45,1 mlrd dollarǵa jetti.
