Oljas Bektenov: Qazaqstan shıkizat modelinen tereń óńdeý ekonomıkasyna kóshýdi jedeldetedi
ASTANA. KAZINFORM — Qazaqstan taý-ken metallýrgııa salasyn damytýdy óndirý kólemin ulǵaıtýdan da aýqymdyraq turǵydan qarastyrady. Bul týraly Oljas Bektenov 16-shy Astana Mining & Metallurgy 2026 kongresinde aıtty, dep habarlady Úkimettiń baspasóz qyzmetri.
Premer-mınıstr Oljas Bektenov strategııalyq mindet – salanyń jańa modelin qalyptastyrý ekenin atap ótti, onda elimiz shıkizat jetkizýshi retinde ǵana emes, álemdik naryqtarda suranysqa ıe básekege qabiletti ónerkásiptik ónim óndirýshi retinde de óz pozıtsııasyn nyǵaıta túspek.
— Prezıdent Qasym-Jomart Toqaev negizinen shıkizattyq modelden turatyn ekonomıkany tereń óńdeýge jáne joǵary qosylǵan qunǵa kezeń-kezeńimen kóshirý mindetin qoıdy. Búginde tereń óńdeýdi damytýǵa jáne qosylǵan quny joǵary ónim úlesin arttyrýǵa baǵyttalǵan aýqymdy jobalar júzege asyrylýda. Sońǵy eki jylda jalpy quny $1 mlrd-tan asatyn katodty mys, ferrosılıtsıı, ferroqorytpalar jáne basqa da ónimder shyǵaratyn birqatar iri óndirister paıdalanýǵa berildi,— dep atap ótti Premer-mınıstr.
Abaı oblysynda jalpy quny $1,5 mlrd-tan asatyn mys balqytý zaýytyn salý jobasy júzege asyrylýda, ol búginde eksporttalatyn mys kontsentratyn is júzinde tolyqtaı el ishinde óńdeýge múmkindik beredi. Pavlodar oblysynda jylyna 300 myń tonna altyn-mysty kontsentrat jáne 15 tonnaǵa deıin altyn óndirý qýattylyǵymen gıdrometallýrgııalyq kombınat salynýda. «Qarmet» kompanııasy Qaraǵandy oblysyndaǵy metallýrgııalyq óndiristi aýqymdy jańǵyrtyp, avtomobıl bolatyn óndirý isin qosa alǵanda, qosylǵan quny joǵary ónim shyǵarýdy jolǵa qoıýdy josparlap otyr. Bul tek jeke ınvestıtsııalyq jobalardy júzege asyrý týraly emes.
— Memleket basshysynyń tapsyrmasymen Qazaqstan zamanaýı óndiristerdi damytýǵa, tehnologııalardy engizýge jáne qosylǵan quny joǵary ónim shyǵarýǵa negizdelgen jańa ındýstrııalandyrý baǵytyn júıeli túrde júzege asyrýda. Osy mindetterdi oryndaý maqsatynda Qazaqstan AQSh, Qytaı, Eýropalyq Odaq, Japonııa, Ońtústik Koreıa jáne basqa da elderdiń iri kompanııalarymen belsendi yntymaqtasýda. Biz kapıtal tartýmen ǵana shektelip qalmaı, uzaqmerzimdi tehnologııalyq seriktestikterdi damytýǵa, óndiristerdi lokalızatsııalaý men tehnologııalardy transfertteýge jáne bilikti kadrlar daıarlaýǵa da múddelimiz. Mine, dál osyndaı tásil el ishinde turaqty óndiristik tizbekter qalyptastyrýǵa múmkindik beredi jáne Qazaqstannyń álemdik ónerkásiptik júıege tereńirek ıntegratsııalanýyn qamtamasyz etedi. Qazaqstan strategııalyq shıkizattyń senimdi jetkizýshisi retinde óz pozıtsııasyn nyǵaıtyp, tereń óńdeýdi jáne qosylǵan quny joǵary ónim shyǵaratyn ortalyqqa aınalýdy, sondaı-aq strategııalyq mańyzdy mıneraldar men zamanaýı tehnologııalar salasynda iri halyqaralyq jobalardy júzege asyrý alańyna aınalýdy kózdeıdi, — dep atap ótti Oljas Bektenov.
Búgin bizdiń elderimiz úshin álemdik ekonomıkadaǵy pozıtsııany nyǵaıtýǵa jańa múmkindikter ashylyp otyr.
— Bizdiń mindetimiz – osy múmkindikti ındýstrıaldy damýdy jedeldetý, ınvestıtsııa tartý, ozyq tehnologııalardy engizý jáne jańa deńgeıdegi ekonomıkany qalyptastyrý úshin paıdalaný. Men Qazaqstannyń Eýrazııadaǵy jetekshi taý-ken metallýrgııalyq ortalyqtardyń biri bolyp, halyqaralyq bıznes úshin senimdi serikteske aınalý úshin barlyq qajetti alǵysharttarǵa ıe ekenine senimdimin. Búgingi Astana Mining & Metallurgy Kongresi aıasyndaǵy dıalog taý-ken metallýrgııa keshenin ári qaraı damytýǵa jáne onyń halyqaralyq básekege qabilettiligin nyǵaıtýǵa aıtarlyqtaı úles qosatynyna senimdimin, — dep atap ótti Premer-mınıstr Astana Mining & Metallurgy 2026 kongresinde sóılegen sózinde.
Aıta keteıik, 2026–2028 jyldary geologııalyq barlaý jumystaryna $470 mln-ǵa jýyq memleket ınvestıtsııasy salynady.
