Oljas Bektenov: Qazaqstan ekonomıkasy alǵash ret 300 mlrd dollarlyq mejeden asty
ASTANA. KAZINFORM - Oljas Bektenov 16-shy Astana Mining & Metallurgy 2026 kongresine qatysty. Premer-mınıstr plenarlyq sessııada sóılegen sózinde 2025 jyldyń qorytyndysy boıynsha Qazaqstan ekonomıkasy 6,5% deńgeıinde turaqty ósim kórsetkenin atap ótti, dep habarlaıdy Úkimettiń baspasóz qyzmeti.
Jalpy ishki ónim kólemi alǵash ret $300 mlrd-tan asty. Bul nátıje – Memleket basshysy Qasym-Jomart Toqaevtyń tehnologııalarǵa, ınvestıtsııalarǵa, ónerkásip pen adamı kapıtaldy damytýǵa negizdelgen zamanaýı ekonomıka qurý baǵytynyń jemisi.
-Elimizdiń jańa Konstıtýtsııasy osy baǵyttyń ınstıtýtsıonaldyq negizderin bekitedi. Ol menshik quqyǵy men ınvestıtsııalardy qorǵaý kepildikterin kúsheıtedi, zań ústemdigi qaǵıdattaryn nyǵaıtady jáne eldiń uzaqmerzimdi ekonomıkalyq damýy úshin berik negiz qalyptastyrady. Taý-ken metallýrgııasy keshenin odan ári damytý isinde bul másele aıryqsha mańyzǵa ıe. Jer qoınaýyn paıdalaný, metallýrgııa jáne tereń óńdeý salalaryndaǵy iri jobalardy júzege asyrý qomaqty ınvestıtsııa men uzaqmerzimdi ınvestıtsııalyq tsıklderdi talap etedi. Sondyqtan ınstıtýttardyń ornyqtylyǵy, retteýdiń boljamdylyǵy jáne bıznes tarapynan senimniń joǵary deńgeıi salanyń turaqty damýyn qamtamasyz etetin negizgi sharttardyń birine aınalýda, - dep atap ótti Oljas Bektenov.
Qazaqstan básekelik artyqshylyqtaryna súıengen zamanaýı ındýstrıaldy saıasatty júzege asyra otyryp, jańa býyn óndiristerin qurý arqyly turaqty ekonomıkalyq ósimdi qamtamasyz etýdi jalǵastyrady.
Aıta keteıik, Kongress – jyl saıyn taý-ken metallýrgııa salasynyń bolashaǵyn talqylaý úshin túrli memleketter ókilderin, bıznes qaýymdastyǵyn, sarapshylar ortasyn jáne halyqaralyq uıymdar ókilderiniń basyn biriktiretin bedeldi alań.
Forýmǵa álemniń 16 elinen 1,5 myńnan astam delegat jınalýy – Qazaqstannyń taý-ken metallýrgııa keshenin damytýǵa degen joǵary qyzyǵýshylyqtyń aıqyn dáleli.
Aıta keteıik, osyǵan deıin Úkimet basshysyy Qazaqstan taýarlary álemniń 127 eline eksporttalatynyn aıtqan bolatyn.
