Oljas Bektenov: Kazakh Invest kompanııasyn sapaly túrde qaıta qurylymdaý qajet

ASTANA. KAZINFORM – Premer-mınıstr Oljas Bektenov «Kazakh Invest» ulttyq kompanııasy» AQ dırektorlar keńesiniń otyrysyn ótkizip, onda Memleket basshysynyń el ekonomıkasyna ınvestıtsııa tartý jónindegi tapsyrmalarynyń oryndalý barysy qaraldy, dep habarlaıdy Úkimettiń baspasóz qyzmeti.

Baspasóz qyzmetiniń málimetterine qaraǵanda, basqarma tóraǵasy Sultanǵalı Kenjequlov Kazakh Invest kompanııasynyń bıylǵy 10 aıdaǵy qyzmetiniń qorytyndylary týraly baıandady, sonymen qatar uıymdyq qurylymdy ózgertý máselelerin Dırektorlar keńesiniń talqylaýyna shyǵardy. Atap aıtqanda, ortalyq keńsede qosymsha laýazymdar engizý jáne shetelderde jańa ókildikter ashý usynyldy.

Premer-mınıstr Kazakh Invest kompanııasy usynyp otyrǵan uıymdyq qurylymyn qabyldamady, ony daıyndaýdaǵy ústirt kózqarasty atap ótti.

Oljas Bektenov qoldanystaǵy shtat sany sheńberinde kompanııany sapaly túrde qaıta qurylymdaý qajettigine nazar aýdardy. Jumystyń ábden bıýrokratııalanyp, naqty nátıjelerge baǵyttalmaı otyrǵanyna qatysty syn aıtyldy.

Premer-mınıstr Kazakh Invest ekonomıkaǵa qomaqty ınvestıtsııa tartýdyń tıimdi, ıkemdi ári utqyr quralyna aınalýy tıis ekenin atap ótti. Ol úshin protsesterdi qaıta qurylymdap, árbir qyzmetker úshin naqty tıimdilik kórsetkishterin engizý qajet.

Ulttyq kompanııa qazaqstandyq óndirýshilerdi qoldaý arqyly ınvestorlar tóńireginde turaqty óndiris tizbegin qurýǵa baǵyttalǵan.

«Bul jumysty kúsheıtý qajet. Eń bastysy – naqty nátıje. Syldyr sózden buryn, jobalardy júzege asyrýǵa, kásiporyndardy iske qosýǵa mán berý kerek», - dep atap ótken Oljas Bektenov «ınvestıtsııalyq tapsyrys» tetigin belsendi paıdalaný qajettigin basa aıtty. 

Bul resýrstardy kómir jáne munaı hımııasy, agroónerkásip, mashına jasaý sııaqty jáne basqa da keleshegi zor salalarda eksportqa baǵyttalǵan óndiris qurýǵa baǵyttaýǵa múmkindik beredi.

Jıyn qorytyndysy boıynsha Kazakh Invest kompanııasyna kún tártibi sheńberinde usynylǵan qujattardy on kún ishinde pysyqtaý tapsyryldy.

Osyǵan deıin Úkimettiń jarnamany tańbalaý júıesine jańa túzetýler engizip jatqany týraly jazdyq.