Oljas Bektenov Kazakh Invest dırektorlar keńesiniń otyrysyn ótkizdi

ASTANA. KAZINFORM – Premer-mınıstr Oljas Bektenov «Kazakh Invest» ulttyq kompanııasy» AQ dırektorlar keńesiniń otyrysyn ótkizdi. Júrgizilip jatqan jumys qorytyndylary jáne ulttyq kompanııanyń el ekonomıkasyna odan ári ınvestıtsııa tartý jónindegi josparlary qaraldy. 

«Kazakh Invest» UK» AQ basqarma tóraǵasy Erjan Elekeev bıyl ortalyq jáne jergilikti memlekettik organdarmen birlesken jumys nátıjesinde 4,8 myńǵa jýyq jumys ornyn asha otyryp, quny $1,1 mlrd-ty quraıtyn 22 ınvestıtsııalyq joba iske qosylǵanyn baıandady. Búgingi tańda Almaty oblysynda volfram kenderin óńdeý jáne Almaty qalasynda isikke qarsy biregeı preparattar óndirý kásiporyndary jáne basqa da nysandar ashyldy.

Sonymen qatar 7 joba boıynsha, onyń ishinde Jambyl oblysynda 1 GVt JES salý, Almaty oblysynda sút ónimderin óndirý, Shymkent qalasynda jylyjaı keshenin salý boıynsha jalpy quny jalpy $2,5 mlrd bolatyn ınvestıtsııalyq kelisimderge qol qoıyldy.

Qazaqstan ekonomıkasynyń perspektıvaly salalaryna ınvestıtsııa tartýdyń maqsatty jańa tásili engizildi. Astyqty tereń óńdeý, kómir hımııasy, munaı hımııasy jáne munaı-gaz jabdyqtaryn óndirý sekildi 4 baǵyt anyqtaldy.

Aldaǵy úsh jylda CHN Energy, Carlsberg, PepsiCo, ULTRADECOR, LASSELSBERGER GROUP sııaqty jáne basqa da kompanııalarmen birlese otyryp, iri jobalardy júzege asyrý úshin $10 mlrd tartý josparlanyp otyr. 

Investıtsııalyq qyzmetti tsıfrlandyrý boıynsha aqparat tyńdaldy. Investıtsııalyq jobalardy barlyq kezeńderde – olardy iske qosýdan bastap paıdalanýǵa berý jáne odan keıingi úsh jyldyq monıtorıngige deıingi súıemeldeýdiń keshendi ekojúıesin qurý boıynsha jumystar júrgizilip jatyr. Investorlarmen ózara is-qımyl «bir tereze» qaǵıdaty boıynsha qurylady, sonymen birge «jasyl dáliz» jáne «prokýrorlyq súzgi» tetikteriniń jumysy qamtamasyz etiledi.

Otyrys qorytyndysy boıynsha 2025 jylǵa arnalǵan jumys jospary bekitildi.