Oljas Bektenov qazaq-qytaı kelisimderin júzege asyrý máseleleri boıynsha keńes ótkizdi
ASTANA. KAZINFORM — Oljas Bektenov joǵary deńgeıdegi kelissózder qorytyndysy boıynsha qazaq-qytaı kelisimderin júzege asyrý máseleleri boıynsha keńes ótkizdi. Bul týraly Úkimettiń baspasóz qyzmeti habarlady.
Premer-mınıstr Oljas Bektenov Qytaı Halyq Respýblıkasymen yntymaqtastyq máseleleri boıynsha keńes ótkizdi. Prezıdent Qasym-Jomart Toqaev pen QHR tóraǵasy Sı Tszınpınniń taıaýdaǵy sapary barysyndaǵy kelissózderi aıasynda qol jetkizilgen ýaǵdalastyqtardy eskere otyryp, ınvestıtsııalyq jobalardy iske asyrý máseleleri talqylandy.
Syrtqy ister mınıstrligi derekteri boıynsha, qazir Qazaqstanda qytaılyq ınvestorlardyń qatysýymen 50 myńǵa jýyq jumys orny ashylyp, jalpy quny $66,4 mlrd bolatyn 224 ındýstrııalyq joba júzege asyrylýda. QHR Qazaqstan ekonomıkasyndaǵy eń iri ınvestorlardyń bestigine kiredi: 2005-2024 jyldar aralyǵynda ınvestıtsııa kólemi $26,4 mlrd.
Premer-mınıstr QHR tóraǵasynyń taıaýda Qazaqstanǵa jasaǵan sapary yntymaqtastyqqa eleýli serpin bergenin atap ótti. Sondaı-aq Astanada ótken «Ortalyq Azııa — Qytaı» ındýstrııalyq jáne ınvestıtsııalyq yntymaqtastyq forýmynyń mańyzdylyǵy atap ótildi. Forým aıasynda Qazaqstan men Qytaı arasynda jalpy quny $24 mlrd-ty quraıtyn 58 kommertsııalyq kelisimge qol qoıyldy.
— Memleket basshysy 2029 jylǵa deıin keminde $150 mlrd kóleminde sheteldik ınvestıtsııa tartý mindetin qoıdy. Osy turǵyda jetekshi ekonomıkalyq derjavalardyń biri jáne bizdiń negizgi ınvestıtsııalyq seriktesimiz Qytaı elimen tolyqqandy kooperatsııany odan ári tereńdetý — Qazaqstannyń asa mańyzdy basymdyǵy. Sondyqtan ınvestıtsııalar kólemin arttyrý, jańa birlesken jobalardy iske qosý, ásirese shıkizattyq emes ári eksportqa baǵdarlanǵan ónimderdi óndirý boıynsha júıeli sharalar qajet. QHR tóraǵasynyń jaqynda Qazaqstanǵa jasaǵan sapary eki el arasyndaǵy ekonomıkalyq áriptestiktiń joǵary deńgeıin dáleldep, odan ári nyǵaıta tústi. Árbir jobanyń júzege asyrylýy meniń tikeleı baqylaýymda bolady, tolyq qoldaý kórsetiledi, — dep tapsyrdy Oljas Bektenov.
Premer-mınıstr jańa jobalary joq óńirlerde, onyń ishinde Abaı, Shyǵys Qazaqstan, Batys Qazaqstan oblystarynda jumysty jandandyrý qajettigin basa aıtty Oljas Bektenov atalǵan óńir basshylyǵyna qysqa merzimde seriktestermen ózara is-qımyl ornatýdy jáne naqty bastamalar usynýdy tapsyrdy.
Uzaqmerzimdi seriktestik ornatý jáne ınvestıtsııa tartý maqsatynda aımaqtyq delegatsııalardyń Qytaı provıntsııalaryna saparlaryn jandandyrý jónindegi tapsyrmany iske asyrýǵa nazar aýdaryldy. Oljas Bektenov Almaty qalasy, Jambyl, Qyzylorda, Atyraý, Pavlodar, Aqtóbe, SQO, ShQO, BQO, Almaty jáne Abaı oblystary sııaqty birqatar óńirde oń dınamıkaǵa toqtalyp, onda kezdesýler ótkizilip, kelisimder jasalyp, aldyn ala ýaǵdalastyqtar belgilengenin atap ótti. Qalǵan óńirlerge osy baǵytta jumys isteý tapsyryldy.
Sondaı-aq keńes barysynda «Ortalyq Azııa — Qytaı» forýmy aıasynda óńirlerdiń qytaılyq seriktestermen jasasqan jańa kelisimderin júzege asyrý máseleleri qaraldy. Máselen, Almaty oblysynda «jasyl» energetıka, logıstıka, AÓK jáne ónerkásip salasyndaǵy jobalardy qosa alǵanda, $6 mlrd-tan astam somany quraıtyn 7 qujatqa qol qoıdy. Astana qalasy, Qyzylorda jáne Túrkistan oblystary ınfraqurylym, agroónerkásip jáne ónerkásip salalarynda bastamalar usyndy.
Keńes qorytyndysy boıynsha memlekettik jáne jergilikti atqarýshy organdarǵa qol qoıylǵan kelisimderdi is júzinde júzege asyrýdy, árbir kezeńde barlyq jobany súıemeldeýdi, sondaı-aq biryńǵaı memlekettik ınvestıtsııalyq saıasat sheńberinde is-qımyldardy úılestirýdi qamtamasyz etý tapsyryldy.
Aıta ketelik buǵan deıin Oljas Bektenov vegetatsııalyq kezeńde sý táýekelderin basqarý jónindegi óńirlik shtabtar qurýdy tapsyrǵan edi.