Oljas Bektenov «QazAgro» týraly: Bul másele búgin ǵana týyndaǵan joq

NUR-SULTAN. QazAqparat – QR Aýyl sharýashylyǵy mınıstrliginde ótken jemqorlyqqa qarsy is-qımyl týraly keńeste «QazAgro» holdınginiń máselesi de talqyǵa tústi, dep habarlaıdy QazAqparat tilshisi.

QR Sybaılas jemqorlyqqa qarsy kúres agenttigi tóraǵasynyń birinshi orynbasary Oljas Bektenov holdıngtiń jumysyndaǵy negizgi problemalardy atady.

«Ózderińiz bilesizder, Úkimettiń keńeıtilgen otyrysynda «QazAgro» jumysy synǵa ushyrady. Prezıdent bul qurylymnyń tıimsizdigi týraly ashyq málimdedi. Kóptegen qarjylyq kemshilikter, qarajatty tıimsiz paıdalaný máseleleri kóterildi. Biz de bul problemany zerttep, aınalysqanbyz. Óıtkeni, bul másele búgin nemese bıyl ǵana týyndap otyrǵan joq», - dedi ol.

Holdıng qyzmetiniń turǵyndarǵa tıimsiz uıymdastyrylǵanyn ataǵan agenttik ókili atalmysh mekemeniń enshiles kásipornynda basshylyq qyzmet atqarǵan laýazymdy tulǵanyń sottalǵanyn aıtty.

«Agrarlyq nesıe korporatsııasy nesıe berý jáne kórsetiletin qyzmetter boıynsha qujattar tizimin naqty usynbaǵan. Bireýge basqa tizim usynsa, kelesi adamǵa múlde bólek tizim bergen. Agrarlyq nesıe korporatsııasynyń basqarma tóraǵasynyń orynbasary Ahmetov sybaılas jemqorlyq úshin sottaldy. Bul jerde, tutastaı alǵanda, holdıngtiń qanshalyqty tıimdi ekenin zerttep, »tıimdi etý úshin ne isteý kerek?» degen suraqqa jaýap tabý mindeti tur», - dedi Oljas Bektenov.