Oljas Bektenov Qańtar oqıǵasy týraly: Barlyq aqıqat ashyldy

ASTANA. KAZINFORM — Premer-mınıstr Oljas Bektenov Úkimette ótken baspasóz máslıhatynda 2022 jylǵy Qańtar oqıǵasy týraly tilshiler suraǵyna jaýap berdi.

— Qańtar oqıǵasynyń shyndyǵy qanshalyqty ashyldy? Sheneýnik retinde emes, ul-qyz tárıbelep otyrǵan áke retinde búldirshinderdiń qazasy týraly ne aıtasyz?, — dep suraq qoıdy jýrnalıst.

— Bul óte kúrdeli másele. Qasiretti Qańtar, ózderińiz bilesizder, óte qaıǵyly oqıǵa boldy. Birneshe sot protsesteri ótti. Menińshe, barlyq aqıqat ashyldy. Bári belgili boldy. Kópshilikke de aqparat berildi. Sondyqtan bul másele tolyǵymen sheshildi dep oılaımyn. (Búldirshinder qazasy — red.) árıne qasiret, qaıǵyly oqıǵa, osyndaı jaǵdaı tarıhymyzda boldy. Biraq Memleket basshysynyń saıası jigeriniń arqasynda biz osy jaǵdaıdan aman-esen shyqtyq, — dep jaýap berdi Oljas Bektenov.

Aıta keteıik, 2022 jylǵy Qańtar oqıǵalary Qazaqstan tarıhyndaǵy jańa betburys kezeńi boldy. Gaz baǵasynyń qymbattaýyna qarsylyq tutas el boıynsha birneshe myń adam qatysqan narazylyqtarǵa ulasty; keıbir beıbit demonstratsııalar tártipsizdikterge aınaldy.

Bul týraly Prezıdent Teleradıokesheni «Kýáger» derekti fılmin túsirdi.

Bıyl birneshe oblysta Qańtar oqıǵasy kezinde urlanǵan qarý-jaraqtar tabyldy.