Oljas Bektenov Iran elshisiniń Taıaý Shyǵystaǵy ahýalǵa qatysty málimdemesine oraı pikir bildirdi
ASTANA. KAZINFORM - Eýrazııalyq úkimetaralyq keńestiń keńeıtilgen otyrysy aıasynda QR Premer-mınıstri Oljas Bektenov Qazaqstannyń EÚAK-qa tóraǵalyǵyn eskere otyryp, Iran Islam Respýblıkasynyń elshisi Alı Akbar Djokardyń Iran tóńiregindegi jáne jalpy Taıaý Shyǵystaǵy áskerı-saıası ahýalǵa qatysty málimdemesine oraı pikirin bildirdi.
Oljas Bektenov EAEO-nyń ekonomıkalyq sıpatyn atap ótti.
-Eýrazııalyq ekonomıkalyq odaq aıasyndaǵy ózara is-qımyl tek ekonomıkalyq sıpatqa ıe, onyń mandaty halyqaralyq saıası jáne aımaqtyq qaýipsizdik máselelerin talqylaýdy kózdemeıdi, — dedi Oljas Bektenov.
Iran Islam Respýblıkasy Elshiliginiń málimdemesine qatysty, ókinishke qaraı, sońǵy ýaqytta álemdegi oryn alǵan geosaıası ahýal óte kúrdeli ári turaqsyz kúıde qalyp otyrǵany atap ótildi.
Kóptegen elderde qarýly qaqtyǵystar shıelenisip, bul jahandyq ekonomıkaǵa teris áserin tıgizýde. Qazaqstan Prezıdenti eldiń ustanymyn bildirip, azamattyq jáne ekonomıkalyq nysandarǵa jasalatyn qarýly shabýyldardy toqtatýǵa jáne kelissózder ústeline oralýǵa shaqyrdy.
- Memleket basshysy Qasym-Jomart Toqaev osynaý qıyn jaǵdaıda bizdiń elimiz deldal rólin kózdemeıtinin atap ótti. Sonymen qatar múddeli taraptar nıet bildirgen jaǵdaıda, Qazaqstan kıeli Túrkistan qalasynda beıbit dıalog uıymdastyrýǵa daıyn,-dedi Premer-mınıstr.
Oljas Bektenov Qazaqstannyń barlyq seriktesteri qaqtyǵysty tez arada toqtatyp, kelissózder úderisine qaıta oralý týraly ustanymdy qoldaıtynyna senim bildirdi.
Osyǵan deıin Oljas Bektenov EAEO-daǵy júk aǵyndaryn úılestirýdiń ıntegratsııalanǵan platformasyn qurýdy usyndy.
