Oljas Bektenov ınvestorlarǵa: Memorgandar tarapynan eshqandaı qysym kórmeısizder

ASTANA. KAZINFORM — Búgin Úkimet otyrysynda Premer-Mınıstr Oljas Bektenov otandyq jáne sheteldik ınvestorlarǵa úndeý joldady.

«Búginde álemniń kóptegen elderi ınvestıtsııa tartýǵa barynsha mán berip otyr. Qazaqstannyń da maqsaty — sol! Biz otandyq jáne sheteldik bıznespen ózara tıimdi yntymaqtastyq ornatýǵa múddelimiz. Biz uzaqmerzimdi ınvestıtsııa úshin barynsha qolaıly jaǵdaı jasaýǵa udaıy umtylyp kelemiz. Joǵary deńgeıde óńdelgen ónimder shyǵarýǵa, aqparattyq tehnologııany ozyq qarqynmen damytýǵa, elimizdiń serpindi damýyna yqpal etetin ınnovatsııalyq kásiporyn qurýǵa baǵyttalǵan árbir iri ınvestıtsııalyq jobaǵa qoldaý kórsetýge Qazaqstan Úkimeti kepildik beredi dep sendirgim keledi», — dedi Úkimet basshysy.

Oljas Bektenov Úkimet ınvestorlarǵa resýrstarǵa kedergisiz qol jetkizýge múmkindik jasaıtynyn, ınfraqurylymdyq jáne konsýltatıvtik qoldaý kórsetip, ónimin ótkizýge kómektesetinin basa aıtty.

«Sizder memlekettik jáne quqyq qorǵaý organdary tarapynan eshqandaı qysym kórmeısizder. Oǵan eshqandaı kúmán bolmasyn. Kerisinshe, Úkimet sizderge senimdi ári ashyq áriptes bolady. Bul máselelerdi sheshý úshin Investıtsııalyq shtab jumys isteıdi. Ótken jyldyń sońynda Prezıdent Qasym-Jomart Toqaev atalǵan Shtabqa erekshe ókilettikter berdi. Biz otandyq jáne sheteldik ınvestıtsııalar aǵynyn arttyrý úshin basqa da bastamalardy iske asyrýǵa nıettimiz. Olardyń qatarynda ekonomıkanyń basym salalarynda ınvestorlar úshin túbegeıli yntalandyrý sharalary men jańa tásilderdi qoldaný, salyqtyq preferentsııalar, bıýrokratııany jáne bızneske qajetsiz talaptardy alyp tastaý kózdelýde. Kúsh-jigerimizdi jumyldyra otyryp, biz Qazaqstan ekonomıkasyn damytýda eleýli tabystarǵa qol jetkizemiz jáne ózara tıimdi yntymaqtastyqty qamtamasyz etemiz dep senemin», — dedi Premer-Mınıstr.