Oljas Bektenov Investıtsııalyq ahýaldy jaqsartý jónindegi keńestiń otyrysyn ótkizdi
ASTANA. KAZINFORM – Premer-mınıstr Oljas Bektenov halyqaralyq bıznes-qoǵamdastyq pen dıplomatııalyq korpýs ókilderiniń qatysýymen Investıtsııalyq ahýaldy jaqsartý jónindegi keńestiń otyrysyn ótkizdi. Bul týraly Úkimettiń baspasóz qyzmeti habarlady.
Jıynda Prezıdenttiń halyqqa Joldaýynda tsıfrlandyrý men jasandy ıntellekti negizinde ekonomıkany jańǵyrtýǵa qatysty qoıǵan mindetterdi eskere otyryp, saýda salasyna tsıfrlyq sheshimderdi engizý máseleleri qaraldy. Sonyń ishinde tutyný taýarlaryn tsıfrlyq tańbalaý júıesin damytý sharalary talqylandy.
Qazirgi ýaqytta Qazaqstanda tańbalaýdy engizý úshin barlyq jaǵdaı jasalǵan: tańbalaýǵa jatatyn taýarlardyń tizbesi jáne olardy 2029 jylǵa deıingi ulttyq damý jospary sheńberinde kezeń-kezeńimen engizý merzimderi bekitilgen. Budan bólek, negizgi baǵyttar men nysanaly ındıkatorlardy aıqyndaı otyryp, 2030 jylǵa deıingi saýda saıasatynyń tujyrymdamasy ázirleý jumystary júrip jatyr.
Saýda jáne ıntegratsııa mınıstrliginiń málimeti boıynsha úsh taýar toby úshin mindetti tańbalaý engizilgen. Shara óziniń tıimdiligin kórsetip otyr, máselen, temeki ónimderi boıynsha bıýdjetke túsimder 1,5 esege, aıaq kıim boıynsha 3 esege, dári-dármekter boıynsha 1,8 ese ósken. Sondaı-aq tańbalaý esebinen zańsyz temeki ónimderin anyqtaý tıimdiligi 6 eseden astam artqan, ol 2022 jylǵy 2 mlrd teńgeden 2024 jyly 12,8 mlrd teńgege jetti. Bul rette sońǵy quralatyn baǵaǵa tıetin áser azaıdy, ol taýar baǵasynyń 1%-na da jetpeıdi.
Kezdesýge qatysýshylar Qazaqstanda júrgizilip jatqan ekonomıkalyq jáne tsıfrlyq reformalar týraly pikirlerin bildirdi.
AQSh-tyń Qazaqstandaǵy mıssııasy basshysynyń orynbasarynyń mindetin atqarýshy Vıktorııa Djastın Sanches Qazaqstannyń tutynýshylardy qorǵaý deńgeıin arttyrýǵa jáne zańsyz saýdaǵa qarsy turýǵa degen umtylysy oń ekenin atap ótti.
Eýropalyq Odaqtyń Qazaqstandaǵy elshisi Aleshka Sımkıch ınvestorlardyń senimin nyǵaıtý maqsatynda bıznes shyǵyndaryn azaıtý jáne boljamdy iskerlik ahýaldy saqtaý úshin tsıfrlyq tańbalaý júıesin birtindep engizý mańyzdy ekenin jetkizdi.
Sondaı-aq Efes Kazakhstan kompanııasynyń bas dırektory Ertan Kýrt ta kezeń-kezeńimen engizýdiń mańyzdylyǵyna nazar aýdarsa, Procter&Gamble dıstrıbıýtorlyq kompanııasynyń bas dırektory Andreı Bashkırov bul máselede basqa elderdiń tájirıbesin eskerý qajettigin aıtty.
Kóterilgen máseleler boıynsha saýda jáne ıntegratsııa vıtse-mınıstri Áset Núsipov jaýap berdi. Tańbalaýdy engizý onyń bızneske áserin taldaýmen qatar júredi. Bul rette túpki nátıje ishki naryqty kontrafaktilik jáne jalǵan ónimderden qorǵaý ǵana emes, sonymen qatar otandyq óndirýshilerdiń básekege qabilettiligin arttyrý jáne eksportty keńeıtý úshin jańa múmkindikter týǵyzý týraly bolmaq. Tsıfrlyq tańbalaý degenimiz – tutynýshylardyń senimin, jetkizý tizbeginiń ashyqtyǵyn jáne memlekettik retteýdiń tıimdiligin arttyratyn naryqty turaqty damytý quraly.
Oljas Bektenov jıyndy qorytyndylaı kele, Qazaqstan uzaqmerzimdi ınvestıtsııalardy tartýda ashyqtyq pen boljamdylyqqa beıil ekenin atap ótti. Úkimet óndiristik qýatty keńeıtýge, lokalızatsııalaý deńgeıin arttyrýǵa jáne el ekonomıkasynyń tsıfrlyq transformatsııasyn tereńdetýge nıetti. Taýarlardy tsıfrlyq tańbalaý júıesin damytý óz kezeginde naryqtyń ashyqtyǵyn arttyrýdyń, tutynýshylardyń quqyqtaryn qorǵaýdyń jáne JІÓ-degi kóleńkeli ekonomıkanyń úlesin azaıtýdyń negizgi quraldarynyń biri retinde qarastyrylady (mundaǵy kórsetkish 2019 jylǵy 23%-dan 2025 jyly 16%-ǵa deıin tómendedi).
Bul rette Premer-mınıstr múddeli memlekettik organdarǵa bıznes tarapy kóterip otyrǵan máselelerdi qosymsha zerdelep, taýarlardy tańbalaýdy aýyrtpalyq salmaı engizý úshin barlyq qajetti sharalardy qabyldaýdy tapsyrdy.
Aıta keteıik, ekonomıkanyń basym sektorlarynda jańa ınvestıtsııalyq jobalar bekitildi.