Oljas Bektenov «ınvestıtsııaǵa tapsyrys» tetigin túbegeıli jańartýy tapsyrdy
ASTANA. KAZINFORM – Іri ınvestorlardy izdeý jáne olardy elimizge tartý jumysyn kúsheıtý kerek. Bul týraly búgin Úkimet otyrysynda Premer-mınıstr Oljas Bektenov aıtty.
- Memleket basshysy jańa ınvestıtsııalyq tsıkldy tolyqqandy iske qosý úshin belsendi sharalar qabyldaýdy tapsyrdy. Bul baǵytta uzaqmerzimdi jáne tehnologııalyq ınvestıtsııalar tartýǵa, óńdeý ónerkásibin damytýǵa jáne ónimdi tereń óńdeýge basa nazar aýdarý kerek. Jalpy qosylǵan qundy eselep arttyratyn serpindi jobalarǵa basymdyq berilýge tıis. Investıtsııalyq saıasat tujyrymdamasyna sáıkes, aldaǵy 5 jylda ınvestıtsııa kólemin 3 ese ulǵaıtý kózdelgen, - dedi ol.
Premer-mınıstr osyǵan baılanysty tehnologııalar men quzyretterdi engizip, jańa naryqtarǵa shyǵýǵa múmkindik beretin iri ınvestorlardy izdeý jáne olardy elimizge tartý jumysyn kúsheıtý kerektigin aıtty.
- «Investıtsııaǵa tapsyrys» tetigin jetildirý mańyzdy, ol Qazaqstannyń uzaqmerzimdi strategııalyq múddelerine saı keletin ári ǵylymdy arqaý etken jańa býyndaǵy óndiristerdiń draıverine aınalýǵa tıis. Syrtqy ister mınıstrligi Ulttyq ekonomıka mınıstrligimen birlesip, on kún ishinde «ınvestıtsııaǵa tapsyrys» tetigin túbegeıli jańartý jónindegi is-qımyl josparyn ázirlesin. Ulttyq ekonomıka mınıstrligi salalyq memlekettik organdarmen birlesip, eki apta merzimde qosylǵan quny joǵary ónimder shyǵaratyn jobalarǵa ınvestıtsııalar tartý úshin qosymsha yntalandyrý sharalaryn pysyqtasyn, - dedi Oljas Bektenov.
Úkimet basshysy bıýdjettik baǵdarlamalardyń ákimshileri bıýdjet qarajatynyń maqsatty ári tıimdi ıgerilýin qamtamasyz ete otyryp, qarjylyq tártipti kúsheıtýi qajettigine nazar aýdartty.
- Ákimderge qosymsha kiristerdi jumyldyryp, ishki rezervterdi barynsha paıdalanýdy tapsyramyn. Bul óńirlerdiń jospardan tys respýblıkalyq bıýdjet qarajatyna táýeldiligin azaıtýǵa múmkindik beredi, - dedi ol.
Premer-mınıstrdiń dereginshe, negizgi makrokórsetkishter boıynsha Túrkistan, Almaty, Jambyl, Qyzylorda, Pavlodar, Mańǵystaý, Qostanaı, Ulytaý, Abaı oblystarynda, Astana, Almaty jáne Shymkent qalalarynda oń dınamıka qalyptasyp otyr.
- Al, Atyraý, Aqmola, Aqtóbe, Qaraǵandy jáne Jetisý oblystarynda eki ındıkator boıynsha tómen kórsetkishter tirkeldi. Atalǵan óńir basshylary jaǵdaıdy túzetý úshin shuǵyl sharalar qabyldaýǵa tıis, - dedi Úkimet basshysy.
Buǵan deıin Premer-mınıstr Oljas Bektenov otandyq ónimdi shetel naryǵyna shyǵarýdaǵy kedergilerdi azaıtýdy tapsyrǵan edi.
