Oljas Bektenov ınvestıtsııa tartý júıesin jetildirý máseleleri jóninde keńes ótkizdi
ASTANA. KAZINFORM – Premer-mınıstr Oljas Bektenov Memleket basshysynyń jańa ınvestıtsııalyq tsıkldy iske qosý sheńberinde qoıǵan mindetterine sáıkes, ınvestıtsııa tartý jáne olardy súıemeldeý júıesiniń tıimdiligin odan ári arttyrý jóninde keńes ótkizdi.
Jıynda ınvestorlarmen ózara is-qımyldy qyzyǵýshylyq tanytý jáne perspektıvaly baǵyttardy zerdeleý kezeńinen bastap jobalardy iske qosý, keńeıtý jáne qaıta ınvestıtsııalaýǵa baǵyttalǵan ınvestıtsııadan keıingi súıemeldeýge deıingi barlyq kezeńde nyǵaıtý tásilderi qaraldy.
Nátıjesinde kelisý rásimderinen ótý merzimderin qysqartý jáne jobalardy iske qosýdy jedeldetý, sondaı-aq olardy masshtabtaý jáne eksportqa shyǵarý máselelerin qatar pysyqtaý kózedelgen.
Sonymen qatar ınvestorlar men jetekshilik etetin memlekettik organdarǵa qolaıly jaǵdaı jasaýǵa múmkindik beretin tsıfrlyq quraldarǵa nazar aýdaryldy.
Syrtqy kontýrdaǵy belsendi ınvestıtsııalyq saıasat máseleleri de talqylandy.
Premer-mınıstrge jaýapty memlekettik organdar men uıymdardyń ınvestorlarmen ózara is-qımyl jónindegi jáne jobalardy el ekonomıkasyna qarajat salýǵa deıin, nysandardy paıdalanýǵa berýge deıin jetkizý kórsetkishi boıynsha jumysyn taldaý nátıjeleri usynyldy.
Biryńǵaı ınvestıtsııalyq vertıkaldy qalyptastyrý jónindegi usynystardy talqylaýǵa Premer-mınıstrdiń orynbasary – ulttyq ekonomıka mınıstri Serik Jumanǵarın, Prezıdenttiń ekonomıkalyq máseleler jónindegi kómekshisi Nurlan Baıbazarov, Prezıdenttiń keńesshisi – Strategııalyq josparlaý jáne reformalar agenttiginiń tóraǵasy Áset Erǵalıev, syrtqy ister mınıstri Muhtar Tileýberdi, saýda jáne ıntegratsııa mınıstri Arman Shaqqalıev qatysty.
Jıyn qorytyndysy boıynsha Premer-mınıstr Oljas Bektenov Memleket basshysy ınvestıtsııalyq saıasat tetikterin túbegeıli jańartý mindetin qoıǵanyn atap ótti. Kapıtal úshin jahandyq báseke jaǵdaıynda Úkimet boljamdy ári qolaıly ınvestıtsııalyq klımatty qamtamasyz etýi kerek. Ulttyq ekonomıka mınıstrligine múddeli memlekettik organdarmen jáne uıymdarmen birlesip, qoldanystaǵy ınvestıtsııa tartý júıesin jetildirý jónindegi is-qımyldyń barynsha naqty josparyn daıyndaý tapsyryldy.
Aıta keteıik, Qazaqstanǵa Ortalyq Azııadaǵy sheteldik ınvestıtsııanyń 70 paıyzyna jýyǵy tıesili.
