Oljas Bektenov ınnovatsııalyq jobalarǵa qoldaý kórsetetin platformany iske qosýdy tapsyrdy
ASTANA. KAZINFORM – Barlyq óndiris oryndarynyń ınnovatsııalyq qyzmeti men tehnologııalyq damý jaǵdaıyna keshendi túgendeý júrgiziledi. Bul týraly Úkimet otyrysynda Premer-mınıstr Oljas Bektenov aıtty.
- Ǵylym mınıstrligi múddeli memlekettik organdarmen birlesip, 3 kúndik merzimde salany vedomstvoaralyq úılestirý jáne tehnologııalyq basymdyqtardy ázirleý úshin Úkimet janynan ınnovatsııalyq shtab qurýy qajet. Premer-mınıstrdiń orynbasary tóraǵalyq etetin Shtab bastapqy ıdeıadan ónim shyǵarýǵa deıingi óndiristik kezeń boıyna ınnovatsııalyq ekojúıeniń barlyq qatysýshylarynyń kúshin jumyldyrýdy qamamasyz etýge tıis. Shtabqa Aıda Ǵalymqyzy Balaeva (Premer-mınıstrdiń orynbasary – Mádenıet jáne aqparat mınıstri) basshylyq etetin bolady. Kásiporyndardyń ınnovatsııalyq belsendiligin yntalandyrý úshin osy jyldyń 1 maýsymyna deıin barlyq óndiris ornynyń ınnovatsııalyq qyzmeti men tehnologııalyq damý jaǵdaıyna keshendi túrde túgendeý júrgizý kerek, - dedi Oljas Bektenov.
Sonymen qatar Úkimet basshysy Ǵylym mınıstrligine múddeli memlekettik organdarmen birlesip, osy jyldyń 1 maýsymyna deıin naqty basym salalar men tehnologııalarǵa nazar aýdara otyryp, ınnovatsııalardy damytý tujyrymdamasyn ázirleýdi tapsyrdy.
- Ǵylym jáne Jasandy ıntellekt mınıstrlikteri salalyq mınıstrliktermen jáne ákimdiktermen birlesip, 1 shildege deıin ınnovatsııalyq jobalardy tirkep, qoldaý kórsetýge jáne monıtorıng júrgizýge arnalǵan «biryńǵaı tereze» jumysyn qamtamasyz etetin tsıfrlyq platformany iske qossyn. Sonymen qatar ázirleýshiler, tehnologııalar jáne áleýetti ınvestorlar týraly málimetterdi qamtıtyn ınnovatsııalyq jobalardyń jalpyǵa qoljetimdi ulttyq tizilimin qurý qajet, - dedi Premer-mınıstr.
Buǵan deıin Úkimet otyrysynda ınnovatsıchlardy damytý máselesi talqylanatynyn jazǵan edik.