Oljas Bektenov halyqaralyq kompanııalardy Qazaqstanda zertteý habyn ashýǵa shaqyrdy
ASTANA. KAZINFORM – Premer-mınıstr Oljas Bektenov óz sózinde tsıfrlyq ınfraqurylymdy damytý máselelerine erekshe nazar aýdardy.
Búginde Qazaqstanda álemdik TOP-500 reıtıngine kiretin óńirdegi eń iri sýperkompıýter klasteri – Alem.Cloud jáne Al-Farabium iske qosylǵan. NVIDIA kompanııasymen seriktestikte táýelsiz esepteý haby qurylýda. Pavlodar oblysynda qýaty 1 GVt-qa deıingi «DÓO alqaby» jobasy júzege asyrylýda, onda derekterdi saqtaýdan bastap esepteý qýattaryna deıin tolyq tsıkldi ınfraqurylym qalyptasady.
Qazaqstan obektıvti básekelik artyqshylyqtarǵa ıe: qoljetimdi elektr energııasy men tómen sıgnal kidirisi elimizdi joǵary ónimdi esepteý júıelerin ornalastyrý úshin eń tartymdy oryndardyń birine aınaldyrady.
Jeke baǵyt retinde Data Embassy formatyn damytýǵa basa kóńil bólinýde. Bul – memleketterge óz derekterin Qazaqstan aýmaǵynda ornalastyryp, sonymen birge olarǵa tolyq quqyqtyq egemendigin saqtaýǵa múmkindik beretin senimniń jańa modeli.
Kelesi qadam – ekonomıkanyń negizgi salalarynda JI-datasetterdi qalyptastyrý jáne salalyq tildik modelderdi damytý. Osy maqsatta memleket ónerkásiptik zattar ınternetin jáne naqty ýaqyttaǵy derekterdi jınaý júıelerin damytatyn kompanııalardy qoldaý sharalaryn iske qosady.
– Bizdiń mindetimiz – bızneske onyń jahandyq básekege qabilettiligin qamtamasyz etetin quraldar usyný. Bul ekojúıeniń mańyzdy elementi – Astanadaǵy Alem.ai halyqaralyq jasandy ıntellekt ortalyǵy. Ol zertteý zerthanalaryn, akseleratorlardy jáne bilim berý baǵdarlamalaryn biriktirip, tehnologııalyq kompanııalar men ındýstrııalyq seriktester úshin tartylys núktesin qalyptastyrady. Biz halyqaralyq kompanııalardy munda óz zertteý habtaryn ashýǵa shaqyramyz. Qazaqstan talanttarǵa, derekterge jáne ındýstrııalyq keısterge qoljetimdilikti usynady, – dep atap ótti Oljas Bektenov.
Premer-mınıstr Prezıdenttiń adamı kapıtaldy damytý máselelerine erekshe nazar aýdaratynyn atap ótti.
AI-Sana baǵdarlamasy aıasynda qazirdiń ózinde shamamen bir mıllıon azamat jasandy ıntellekt daǵdylaryna oqytyldy. TUMO mektep ortalyqtarynan bastap tehnologııalyq kásipkerlerdi daıarlaýǵa deıin tolyqqandy bilim berý ekojúıesi qalyptasýda. Google for Startups qosa alǵanda, halyqaralyq seriktestermen birlesip akseleratsııalyq baǵdarlamalar damytylýda.
Memleket basshysynyń tapsyrmasy boıynsha bıyl Qazaqstanda jańa býyn mamandaryn daıarlaıtyn jáne halyqaralyq ǵylymı yntymaqtastyqty damytatyn JI-ýnıversıtet qurylady.
Oljas Bektenov forýmǵa qatysýshylarǵa arnaǵan sózinde Digital Qazaqstan forýmy – bul iri halyqaralyq is-sharalar serııasynyń bastamasy ǵana ekenin atap ótti. Bıyl elimizde GITEX Ortalyq Azııa jáne Kavkaz, AI & Digital Bridge, sondaı-aq 100-den astam eldiń qatysýshylaryn biriktiretin «Bolashaq oıyndary» ótedi. Tamyz aıynda jasandy ıntellekt boıynsha halyqaralyq olımpıada ótedi.
– Biz barlyq nıet bildirýshilerdi osy is-sharalarǵa qatysýǵa jáne óńirimizdiń jańa tsıfrlyq ekojúıesin qalyptastyrýǵa atsalysýǵa shaqyramyz. Biz birlesken jumysqa, jańa ıdeıalarǵa, tehnologııalarǵa jáne uzaq merzimdi jobalarǵa ashyqpyz. Barlyq qatysýshylarǵa jemisti jumys pen mazmundy pikirtalastar tileımin, – dep atap ótti Oljas Bektenov.
Aıta keteıik, Qazaqstan Premer-mınıstri Oljas Bektenov Shymkent qalasynda «Indýstrııa 5.0: Ózara árekettesýdiń kúshi» taqyrybynda ótken Digital Qazaqstan 2026 halyqaralyq tsıfrlyq forýmynda sóz sóıledi. Forýmǵa EAEO elderiniń úkimetteri basshylary, IT-ındýstrııa ókilderi, halyqaralyq kompanııalardyń ókilderi, ınvestorlar men sarapshylardy qosa alǵanda, 3 myńnan astam delegat qatysyp jatyr.
