Oljas Bektenov Halyqaralyq Araldy qutqarý qorynyń basqarma múshelerimen kezdesti
ASTANA.KAZINFORM - Qazaqstan Premer-mınıstri Oljas Bektenov Halyqaralyq Araldy qutqarý qorynyń basqarma múshelerimen kezdesý ótkizdi. Bul týraly Úkimettiń baspasóz qyzmeti habarlady.
Qazaqstan atalǵan qorǵa tóraǵalyq etýin bıyl aıaqtaıdy.
Jıynǵa Tájikstan Respýblıkasy Premer-mınıstriniń orynbasary Sýlaımon Zıezoda, Túrikmenstan Mınıstrler kabıneti tóraǵasynyń orynbasary Tangrygýly Atahallyev, Ózbekstan Respýblıkasy Prezıdentiniń keńesshisi Shýhrat Ganıev, Ózbekstan Respýblıkasynyń sý sharýashylyǵy mınıstri Shavkat Hamraev, Qyrǵyz Respýblıkasynyń Sý resýrstary, aýyl sharýashylyǵy jáne qaıta óńdeý ónerkásibi mınıstriniń orynbasary – Mınıstrlik janyndaǵy Sý resýrstary qyzmetiniń dırektory Almaz Jeenalıev, Halyqaralyq Araldy qutqarý qory atqarýshy komıtetiniń tóraǵasy Ashat Orazbaı, sondaı-aq Qazaqstan Respýblıkasynyń salalyq mınıstrlikteri men vedomstvo basshylary qatysty.
Sý sharýashylyǵy salasyndaǵy óńirlik yntymaqtastyqty ári qaraı damytý, Qor qyzmetiniń tıimdiligin arttyrý, sondaı-aq bıylǵy 22 sáýirde Astanada ótetin HAQQ-ǵa múshe memleketter basshylary keńesiniń otyrysyna daıyndyq máseleleri qaraldy.
Oljas Bektenov Ulttyq quryltaıdyń V otyrysynda Memleket basshysy Qasym-Jomart Toqaev aıqyndaǵan Araldy qutqarý jáne transshekaralyq sý resýrstaryn turaqty basqarý máseleleri basym baǵyttar qatarynda ekenin atap ótti.
HAQQ otyz jyldan astam ýaqyt boıy Ortalyq Azııa memleketteriniń sý, ekologııalyq jáne áleýmettik-ekonomıkalyq salalardaǵy ózara árekettesýiniń negizgi óńirlik alańy bolyp otyrǵany basa aıtyldy. Kezdesý barysynda sý esebin júrgizý men basqarýdy tsıfrlandyrýdyń mańyzdylyǵy atalyp ótti.
– Munda Syrdarııa jáne Ámýdarııa ózenderi basseınderinde sý resýrstaryn esepke alý, monıtorıng júrgizý jáne bólý boıynsha biryńǵaı avtomattandyrylǵan júıeni kezeń-kezeńimen engizý týraly sóz bolyp otyr. Tsıfrlandyrý men esepke alý sý paıdalanýdyń ashyqtyǵyn qamtamasyz etedi dep oılaımyn. Senimdi derekterdiń bolýy jáne birlesken monıtorıng memleketter arasyndaǵy senimniń negizi bolyp sanalady jáne sý resýrstaryn basqarýdyń tıimdiligin arttyrýǵa múmkindik beredi, – dep atap ótti Oljas Bektenov.
Qazirgi zamanǵy sharttyq-quqyqtyq bazany qalyptastyrý aıasynda Qazaqstan Ortalyq Azııanyń sý resýrstaryn paıdalaný jónindegi Negizdemelik konventsııasyn pysyqtaýdy qoldaıdy.
Qujat sý resýrstaryn utymdy paıdalaný, transshekaralyq zııannyń aldyn alý jáne gıdrologııalyq aqparat almasýdy damytý boıynsha kelisilgen qaǵıdattardy bekitýi tıis.
Qazaqstan Prezıdenti Qasym-Jomart Toqaev jahandyq sý problemalaryn sheshý úshin Birikken Ulttar Uıymy qurylymy aıasynda Halyqaralyq sý uıymyn qurýdy usyndy. Bul bastama kúsh-jigerdi biriktirýge jáne qosymsha resýrstardy tartýǵa, sonyń ishinde óńirlik jobalardy júzege asyrýǵa múmkindik beredi.
Kezdesý barysynda Qor jumysynyń tıimdiligin arttyrý, onyń ınstıtýttary arasyndaǵy úılestirýdi kúsheıtý jáne qabyldanatyn sheshimderdiń nátıjeli júzege asyrylýyn qamtamasyz etý maqsatynda Halyqaralyq Araldy qutqarý qorynyń uıymdastyrýshylyq qurylymyn jáne sharttyq-quqyqtyq bazasyn jetildirý máselelerine erekshe nazar aýdaryldy.
Sondaı-aq aldaǵy Halyqaralyq Araldy qutqarý qorynyń quryltaıshy memleketteri basshylary keńesiniń otyrysy qarsańynda negizgi máseleler boıynsha kelisilgen tásilderdi ázirleýdiń mańyzdylyǵy atalyp ótti.
Kezdesý qorytyndysy boıynsha taraptardyń syndarly dıalogti jalǵastyrýǵa, sý dıplomatııasyn damytýǵa jáne óńirdiń sý resýrstaryn turaqty basqarýǵa, sondaı-aq Aral teńizi basseınindegi ekologııalyq ahýaldy jaqsartýǵa baǵyttalǵan ortaq sheshimderdi birlesip izdeýge múddeli ekendigi rastaldy.
Aıta keteıik, Aralǵa Esilden sý burý jobasy ýaqytsha toqtatyldy.
