Aral máselesin sheshýde jasandy ıntellekt pen aımaqtyq úılesim mańyzdy
ASTANA. KAZINFORM - Qazaqstan Respýblıkasynyń Premer-mınıstri Oljas Bektenov Qazaqstannyń tóraǵalyǵymen ótip jatqan Halyqaralyq Araldy qutqarý qory (HAQQ) basqarmasynyń ekinshi otyrysyna qatysýshy elder delegatsııalarynyń basshylarymen kezdesý ótkizdi, dep habarlaıdy Úkimettiń baspasóz qyzmeti.
Qazaqstan Halyqaralyq Araldy qutqarý qorynyń qyzmetine basa mán beredi jáne atalǵan uıymdy óńirdegi ekologııalyq sıpattaǵy máselelerdi sheshýdiń, utymdy jáne ózara tıimdi transshekaralyq sý paıdalanýdyń quraldarynyń biri retinde qarastyrady.
Kezdesýde Aral teńizindegi sý deńgeıin arttyrý jónindegi birlesken sharalar, sonyń ishinde Qazaqstan Prezıdenti Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty halyqqa Joldaýynda aıtqan bastamalary sheńberinde talqylandy.
Oljas Bektenov óz sózinde HAQQ-qa qatysýshy memleketterdiń basshylary energetıkalyq jáne azyq-túlik qaýipsizdigin qamtamasyz etýde strategııalyq mańyzy bar sý-energetıkalyq resýrstaryn paıdalanýdyń utymdy tásiline basymdyq beretinin atap ótti.
Osy jyldyń vegetatsııalyq kezeńi óte qıyn ótti. Kúrdeli jaǵdaılarǵa qaramastan, úkimetterdiń syndarly ózara is-qımyly Aral teńizi basseıninde turaqty sý rejımin qamtamasyz etýge múmkindik berdi.
Premer-mınıstr Qyrǵyzstan, Tájikstan jáne Ózbekstan Úkimetteriniń basshylaryna alǵysyn bildirip, úılestirilgen jedel is-qımyldar arqyly ǵana eleýli shyǵyndardyń aldyn alýǵa bolatynyn atap ótti.
«Ár eldiń óz ulttyq múddesi bar, biz ony qashan da qorǵaýǵa mindettimiz. Biraq bizdiń ortaq strategııalyq, uzaqmerzimdi basym maqsatymyz tatý kórshilik qarym-qatynas ekenine senimdimin. Kúndelikti, qysqamerzimdi mindetterdi sheshýde biz uzaqmerzimdi basymdyqtarǵa nuqsan keltirmeýimiz kerek. Máselelerdi árqashan ózara tıimdi ári qolaıly negizde sheshý úshin birlesken sharalar qabyldaıtynymyzǵa senimdimin», — dep atap ótti Oljas Bektenov.
Qazaqstannyń tóraǵalyǵy aıasynda júrgiziletin jumystyń basym baǵyttarynyń biri – tsıfrlyq transformatsııa jáne sý salasynda jasandy ıntellektini qoldaný. JI engizý sýdy paıdalanýdyń ashyqtyǵyn qamtamasyz etedi jáne sý shyǵynyn azaıtýǵa múmkindik beredi. Aral teńizi basseıninde sý resýrstaryn esepke alýdyń, monıtorıng júrgizýdiń, basqarýdyń jáne bólýdiń biryńǵaı avtomattandyrylǵan júıesin engizý boıynsha birlesken jumystyń mańyzdylyǵy da atap ótildi.
Kezdesý barysynda, sondaı-aq, Tájikstan Premer-mınıstriniń orynbasary Zıezoda Sýlaımon, Ózbekstan Prezıdentiniń keńesshisi Shýhrat Ganıev, Túrikmenstan aýyl sharýashylyǵy mınıstri Charyıar Chetıev sóz sóıledi.
Talqylaýdy qorytyndylaı kele, Premer-mınıstr Oljas Bektenov Qazaqstannyń ashyqtyq, yntymaqtastyq jáne syndarly dıalog qaǵıdattaryna beıil ekenin naqtylady.
Osyǵan deıin Aral teńiziniń soltústik bóligin qalpyna keltirý jáne damytý jobasy ázirlenip jatqany týraly jazdyq.