Oljas Bektenov gaz salasyndaǵy tarıf saıasatyn qaıta qaraýdy tapsyrdy
ASTANA. KAZINFORM — Búgingi Úkimet otyrysynda gaz salasyndaǵy baǵa belgileý modelin jetildirý, otandyq óndirýshilerdi qoldaý jáne gaz resýrstaryn tıimdi bólý boıynsha birqatar tapsyrma berildi. Sonymen qatar Premer-mınıstr qoldanystaǵy tarıftik model gaz salasynyń damýyn tejeýge tıis emes ekenin aıtty.
Oljas Bektenov osyǵan baılanysty Ulttyq ekonomıka mınıstrligine Energetıka mınıstrligimen jáne Básekelestikti qorǵaý jáne damytý agenttigimen birlesip, eki aı ishinde halyqqa ataýly qoldaý tetigin saqtaı otyryp, jańa yntalandyrýshy tarıftik saıasat boıynsha usynystar ázirleý tapsyryldy.
Premer-mınıstr sonymen birge Ónerkásip jáne qurylys mınıstrligine, Energetıka mınıstrligine jáne «Samuryq-Qazyna» qoryna bir aı ishinde tek qazaqstandyq óndirýshilerden satyp alynatyn munaı-gaz jabdyqtarynyń tizbesin bekitýdi tapsyrdy.
— Memleket saladaǵy iri ınfraqurylymdyq jobalardy iske asyrýǵa qomaqty qarajat bóledi. Osy baǵytta otandyq óndirýshilerdi kepildik berilgen tapsyryspen qamtamasyz etý mańyzdy, — dedi Oljas Bektenov.
Buǵan qosa, Úkimet basshysy qoljetimdi gaz kólemin tıimdi paıdalaný qajettigin aıtty. Onyń sózinshe, gaz resýrstary eń áýeli halyqtyń qajetine jáne joǵary tehnologııalyq óndiristerdi damytýǵa baǵyttalýǵa tıis.
— Energetıka mınıstrligi óńir ákimdikterimen birlesip, taýarlyq gazǵa qosylǵysy keletin jańa óndiris oryndary úshin energııa tıimdiliginiń krıterıılerin bir aı ishinde ázirleýi qajet, — dedi Úkimet basshysy.
Premer-mınıstr energııany kóp qajet etetin ári tıimdiligi tómen óndiristerge gaz resýrstaryn bólý tájirıbesin toqtatý qajet ekenin aıtty.
Aıta keteıik, Qazaqstanda gazdandyrý deńgeıi 64,2%-ǵa jetti.
