Premer-mınıstr gaz salasyn damytý boıynsha birqatar mindet júktedi
ASTANA. KAZINFORM — Premer-mınıstr Oljas Bektenov Úkimet otyrysynda gaz salasyn damytý boıynsha birqatar mindet júktedi. Ol geologııalyq barlaý jumystaryn jandandyrýdy, gaz tasymaldaý ınfraqurylymyn keńeıtýdi jáne eldi mekenderdi gazdandyrý qarqynyn arttyrýdy tapsyrdy.
Premer-mınıstrdiń aıtýynsha, geologııalyq barlaý jumystaryn damytý gaz salasynyń uzaq merzimdi turaqtylyǵyn qamtamasyz etetin mańyzdy baǵyttardyń biri. Osyǵan baılanysty Energetıka mınıstrligine «QazMunaıGaz» kompanııasymen birlesip, jańa perspektıvaly ýchaskelerdi geologııalyq zertteý jumystaryna tartýdy jedeldetý mindeti qoıyldy.
Sonymen qatar Úkimet basshysy gaz tasymaldaý júıesin damytýdyń mańyzdylyǵyna da toqtaldy. Onyń sózinshe, Beıneý–Bozoı–Shymkent gaz qubyrynyń ekinshi jelisi men Esil–Astana jańa gaz qubyryn salý jobalary strategııalyq mánge ıe.
Bul jobalar Astana qalasyn, ońtústik jáne soltústik óńirlerdi gazben qamtýdy jaqsartyp, ónerkásiptiń damýyna serpin beredi jáne Qazaqstannyń tranzıttik áleýetin arttyrady.
Búginde Qazaqstan halqynyń shamamen 65%-y tabıǵı gazben qamtamasyz etilgen. Memleket basshysy gazdandyrý deńgeıin 80%-ǵa jetkizý jóninde mindet qoıǵan.
Premer-mınıstr óńir ákimdikterine magıstraldyq ınfraqurylym nysandaryn iske qosý merzimderin jergilikti gaz taratý júıeleriniń daıyndyǵymen úılestirýdi tapsyrdy.
— Tıimdiliktiń basty kórsetkishi tartylǵan qubyrlardyń uzyndyǵy ǵana emes, úılerinde gaz paıda bolyp, jelige naqty qosylǵan abonentter sany bolýy tıis, — dedi Oljas Bektenov.
Úkimet otyrysynda gaz salasyn tsıfrlandyrý máselesi de qaraldy. Premer-mınıstr Jasandy ıntellekt mınıstrligine Energetıka mınıstrligimen birlesip, gazdy esepke alýdyń biryńǵaı tsıfrlyq platformasyn qurýdy tapsyrdy.
Sondaı-aq suıytylǵan munaı gazy naryǵyndaǵy jaǵdaıǵa nazar aýdaryldy.
Energetıka mınıstrligine «QazMunaıGaz» kompanııasymen birlesip, bir aı ishinde suıytylǵan gaz óndirý kólemin arttyrý josparyn ázirleý mindeti júkteldi.
Aıta keteıik, Qazaqstanda gazdandyrý deńgeıi 64,2% jetkeni belgili boldy.
