Oljas Bektenov gaz óńdeý zaýyttarynyń qurylysyn apta saıyn baqylaýdy tapsyrdy
ASTANA. KAZINFORM – Premer-mınıstr Oljas Bektenov Úkimet otyrysynda Qashaǵan, Qarashyǵanaq ken oryndary men Jańaózendegi gaz óńdeý zaýyttarynyń qurylysyn apta saıyn baqylaýǵa alýdy tapsyrdy.
Úkimet otyrysynda Premer-mınıstr gaz salasyn damytý memlekettiń energetıkalyq qaýipsizdigine, ekonomıkanyń ınvestıtsııalyq tartymdylyǵyna jáne halyqtyń turmys sapasyna tikeleı áser etetinin atap ótti.
— Osy rette Qashaǵan, Qarashyǵanaq ken oryndarynda jáne Jańaózen qalasynda jańa gaz óńdeý qýattaryn salý jobalarynyń mańyzy erekshe. Dál osy nysandar ishki naryqqa qajetti taýarlyq gaz óndirisin ulǵaıtyp, munaı-gaz hımııasyn damytýdyń draıveri bolýy tıis. Sondyqtan Energetıka mınıstrligine, «Samuryq-Qazyna» qoryna jáne QazaqGaz kompanııasyna atalǵan nysandardyń qurylys-montajdaý jumystaryna apta saıynǵy negizde baqylaý júıesin engizýdi tapsyramyn., — dedi Oljas Bektenov.
Premer-mınıstrdiń aıtýynsha, jańa kásiporyndardy iske qosý, ınvestıtsııalar tartý jáne ónerkásip áleýetin arttyrý úshin gaz ınfraqurylymyn damytý jumystary qarqyndy júrgizilýi qajet.
Aıta keteıik, Qazaqstanda gazdandyrý deńgeıi 64,2%-ǵa jetti.
