Oljas Bektenov Eýrazııalyq damý banki keńesiniń otyrysyn ótkizdi
ASTANA. KAZINFORM – Premer-mınıstr Oljas Bektenov Eýrazııalyq damý banki keńesiniń otyrysyn ótkizdi. Uıymnyń 2024 jylǵy jumysynyń qorytyndylary jáne aǵymdaǵy qyzmettiń ózekti máseleleri qaraldy.
EADB basqarma tóraǵasy Nıkolaı Podgýzov 2022-2026 jyldarǵa arnalǵan strategııanyń negizgi kórsetkishteriniń júzege asyrylýy týraly baıandady. 2024 jyldyń qorytyndysy boıynsha jınaqtalǵan ınvestıtsııalyq portfel $16,5 mlrd deńgeıine jetti, ınvestıtsııalar kólemi ótken jylmen salystyrǵanda $700 mln-ǵa ulǵaıyp, $2,4 mlrd-ty qurady.
Ornyqty damý salasyndaǵy maqsattarǵa qol jetkizýge qosqan úlesi bar jobalardyń úlesi 30%-dan asty, bul nysanaly kórsetkishterden 2 ese kóp. EADB tehnıkalyq qoldaýdyń jobalyq portfelin aıtarlyqtaı ulǵaıtty – 2024 jyly bul kórsetkish 76%-ǵa ósip, tarıhı eń joǵary deńgeıge jetti.
Basqarmanyń jyldyq esebine sáıkes, Banktiń Qazaqstandaǵy ınvestıtsııalyq portfeli $7,2 mlrd-qa jetti, oǵan 116 joba, onyń ishinde aǵymdaǵy $2,9 mlrd-qa 43 joba kirdi. Sondaı-aq Armenııa, Qyrǵyzstan jáne Tájikstandaǵy bastamalaryna ınvestıtsııalardyń ósýi atap ótildi. 2025 jylǵa EADB jınaqtalǵan portfelinde barlyǵy 305 joba bar.
Birinshi jartyjyldyqtyń qorytyndysy boıynsha bıylǵa arnalǵan ınvestıtsııalar jospary oryndaldy – jańa qol qoıý kólemi $2,1 mlrd-ty qurady. Daıyndyqtyń joǵary satysynda qol qoıylǵan jobalardyń áleýetti kólemi $4 mlrd-tan asady.
Aıta ketý kerek, EADB qurý týraly kelisimge Ózbekstan Respýblıkasy resmı túrde qosyldy. Otyrys barysynda Ózbekstannyń ınvestıtsııalar, ónerkásip jáne saýda mınıstri Lazız Kýdratov Bankpen belsendi ózara is-qımylǵa daıyn ekenin jetkizdi.
Otyrys qorytyndysy boıynsha birqatar sheshim, onyń ishinde uıymdastyrýshylyq jáne qarjylyq sıpattaǵy sheshimder qabyldandy. Keńes músheleriniń usynysy boıynsha QR Premer-mınıstri Oljas Bektenov EADB Keńesiniń tóraǵasy bolyp saılandy. Tóraǵanyń orynbasary bolyp QR qarjy mınıstri Mádı Takıev taǵaıyndaldy.
Aıta keteıik, Úkimet ınflıatsııany tejeý boıynsha keshendi is-sharalar ázirledi.