Oljas Bektenov Eýrazııalyq damý banki basshysymen ınvestıtsııalyq jobalardy talqylady
ASTANA. KAZINFORM — Oljas Bektenov EADB basshysy Nıkolaı Podgýzovpen birlesken jobalardy júzege asyrý máselelerin talqylady. Bul týraly Úkimettiń baspasóz qyzmeti habarlady.
Qazaqstan Respýblıkasynyń Premer-mınıstri Oljas Bektenov Eýrazııalyq damý bankiniń basqarma tóraǵasy Nıkolaı Podgýzovpen kezdesý ótkizdi. Onda ekonomıkanyń basym baǵyttaryndaǵy jobalardy júzege asyrý máseleleri jáne ınvestıtsııalyq yntymaqtastyqty odan ári keńeıtý perspektıvalary talqylandy.
Kezdesý barysynda Premer-mınıstr EADB-nyń kezekti strategııalyq kezeńiniń aıaqtalǵany jáne Qazaqstanda jobalardy júzege asyrý boıynsha júrgizilip jatqan jumystar týraly habardar etildi.
Banktiń jınaqtalǵan portfelinde ınvestıtsııalardyń jalpy kólemi $19,6 mlrd bolatyn 326 joba bar. Tek 2022-2026 jyldary EADB qatysýshy elderdiń ekonomıkasyna $9 mlrd ınvestıtsııalady, onyń ishinde $5,2 mlrd ınvestıtsııalyq mindettemeler Qazaqstanǵa tıesili, bul Banktiń buǵan deıingi 15 jyldaǵy ınvestıtsııalar kólemimen teń. Sońǵy tórt jylda el ekonomıkasyna salǵan ınvestıtsııa kólemi jyl saıyn $1 mlrd-tan astam bolǵan bolsa, 2025 jyly $1,5 mlrd-qa jetti.
Qazaqstannyń EADB-nyń aǵymdaǵy ınvestıtsııalyq portfelindegi úlesi búgingi kúni 64,9%-dy quraıdy. Banktiń elimizge salǵan ınvestıtsııalary negizgi sektorlar boıynsha bólingen: shamamen $2,1 mlrd — ónerkásipti damytýǵa, $1 mlrd — energetıkaǵa, $1 mlrd — kólik ınfraqurylymyna, $1 mlrd — qarjy sektoryna baǵyttalǵan.
Júzege asyrylǵan mańyzdy jobalardyń ishinde — «Sılleno» gaz óńdeý zaýytynyń, Atyraý oblysyndaǵy KPI gaz-hımııa kesheniniń qurylysy, taý-ken metallýrgııa kesheniniń kásiporyndaryn jańǵyrtý, Qaraǵandy, Almaty, Aqtóbe qalalaryndaǵy JEO-lardy qaıta jańartý jáne taǵy basqalar bar. Bank dástúrli energetıkanyń da, jańartylatyn energetıkanyń da damýyn belsendi qoldaıdy. Atap aıtqanda, Qazaqstanda shamamen árbir 8 kVt EADB qatysýymen óndirildi. Bul Qaraǵandy, Túrkistan, Aqmola jáne taǵy da basqa oblystardaǵy jobalar. Kólik salasynda QTJ úshin lokomotıvter men júk vagondaryn jetkizý jáne avtomobıl joldaryn rekonstrýktsııalaý boıynsha jobalar qarjylandyryldy. Tsıfrlyq bastamalar qory jáne tehnıkalyq járdemdesý tetikteri arqyly JI men tsıfrlyq platformalardy damytý salasyndaǵy jobalarǵa qoldaý kórsetiledi.
Osy jyly EADB iri jobalardy, onyń ishinde óńdeý ónerkásibinde, taý-ken óndirý sektorynda jáne taǵy da basqa salalarda qarjylandyrýdy jalǵastyrady. Atap aıtqanda, Óskemen JEO-ny jańǵyrtý jalǵasady, bul qalany jylýmen jabdyqtaý senimdiligin arttyrýǵa jáne jabdyqtardyń tozýyn azaıtýǵa múmkindik beredi. Túrkistan jáne Qyzylorda oblystarynda jańa óndirýshi qýattardy iske qosatyn eki kún elektr stansasyn salý josparlanǵan. Telekommýnıkatsııa salasynda baılanys ınfraqurylymy men tsıfrlyq qamtýdy damytýǵa ınvestıtsııalar kózdelgen. Ónerkásipte óndiristi ulǵaıtýǵa jáne jańa jumys oryndarynashýǵa baǵyttalǵan jobalardy júzege asyrý josparlanǵan.
EADB basqarma tóraǵasy banktiń el ekonomıkasyn damytýǵa jáne azamattardyń ómir súrý sapasyn jaqsartýǵa jan-jaqty járdemdesýge daıyn ekenin atap ótti. Nıkolaı Podgýzov Qazaqstanda júrgizilip jatqan Konstıtýtsııalyq reforma, onyń ishinde eldegi ınvestıtsııalyq ahýaldy odan ári jaqsartýǵa yqpal etetinin jetkizdi.
Premer-mınıstr memlekettiń aǵymdaǵy basymdyqtaryna sáıkes keletin bazalyq ınfraqurylymdy damytýǵa ınvestıtsııa salýdyń mańyzdylyǵyn atap ótti. Budan ári ózara is-qımyldyń negizgi baǵyttarynyń biri Qazaqstanda da, basqa elderde de belsendi damyp kele jatqan tsıfrlyq kún tártibi bolyp sanalatyny aıtyldy. Bul baǵytta birlesip jumys isteý úshin aıtarlyqtaı áleýet bar.
Kezdesý qorytyndysy boıynsha syndarly áriptestikti odan ári nyǵaıtýdyń jáne Qazaqstan ekonomıkasynyń turaqty damýy múddesinde ınvestıtsııalyq yntymaqtastyqty keńeıtýdiń mańyzdylyǵy atap ótildi.
Aıta ketelik elimizdegi arnaıy ekonomıkalyq aımaqtar ınfraqurylymynyń daıyndyǵy qandaı deńgeıde ekenin jazǵan edik.