Oljas Bektenov energetıka salasynda maman tapshylyǵyn sheshetin jospar ázirleýdi tapsyrdy
ASTANA. KAZINFORM – Energetıka jáne jalpy turǵyn úı-kommýnaldyq sharýashylyq salasyndaǵy maman tapshylyǵyn sheshýge baǵyttalǵan naqty is-qımyl josparyn ázirleý kerek. Bul týraly Úkimet otyrysynda Premer-mınıstri Oljas Bektenov aıtty.
- Memleket basshysy jańa elektr stantsııalary men elektr jelilerin salý jáne qoldanystaǵy nysandardy jańǵyrtý, sondaı-aq «taza» kómir generatsııasy men jańartylatyn energetıkany tolyqqandy damytý qajettigin árdaıym atap ótedi. Energııa nysandaryn jóndeý men jańǵyrtýǵa qomaqty qarajat bólinip jatyr, - dedi ol.
Oljas Bektenov Prezıdent halyqqa Joldaýynda bilikti energetık mamandardy daıarlaý isine basa mán bergenine nazar aýdartty.
- Bul oraıda kásibı mamandardyń sabaqtastyǵyn qamtamasyz etý, praktıkalyq quzyretterdi damytý, ásirese atom energetıkasynyń damýyn eskere otyryp, salanyń turaqty kadrlyq rezervin qalyptastyrý qajet. Ǵylym jáne joǵary bilim, Oqý-aǵartý, Energetıka mınıstrlikteri óńir ákimdikterimen birlesip, energetıka jáne jalpy turǵyn úı-kommýnaldyq sharýashylyq salasyndaǵy maman tapshylyǵyn sheshýge baǵyttalǵan naqty is-qımyl josparyn ázirleýge tıis, - dedi Úkimet basshysy.
Aıta keteıik, Erlan Aqkenjenov ákimderge óńirlerde kómirge qatysty jasandy dúrbeleń týdyrmaýdy eskertti.
