Oljas Bektenov Energetıka mınıstrligi ujymyna jańa mınıstrdi tanystyrdy

ASTANA. KAZINFORM – Premer-mınıstr Oljas Bektenov Memleket basshysynyń Jarlyǵymen qyzmetke taǵaıyndalǵan, Energetıka mınıstrligine jańa basshysy Erlan Qudaıbergenuly Aqkenjenovti tanystyrdy. Bul týraly QR Úkimetiniń baspasóz qyzmeti málim etti. 

Oljas Bektenov Almasadam Sátqalıevke munaı-gaz, munaı-gaz hımııasy ónerkásibi, energetıka salalaryna qosqan úlesi úshin alǵysyn bildirip, QR Atom energııasy agenttiginiń tóraǵasy laýazymyndaǵy qyzmetine tabys tiledi.

Premer-mınıstr jańa mınıstrdi tanystyrý barysynda Erlan Aqkenjenovtiń energetıka, munaı jáne gaz salasyndaǵy, munaı ónimderin óńdeý jáne tasymaldaý salasyndaǵy mol tájirıbesi bar ekenine toqtaldy.

Premer-mınıstr Memleket basshysy elimizdiń energetıkalyq ınfraqurylymyn aýqymdy jańartý mindetin qoıǵanyn atap ótti.

Energetıka mınıstrligi ujymy men jańa mınıstrge strategııalyq mańyzy bar jobalardy iske asyrý, onyń ishinde úsh JEO, Ekibastuz GRES-3 qurylysy, Batys aımaqtyń elektr jelilerin elimizdiń elektr energetıkalyq júıesimen biriktirýdi aıaqtaý jáne 3 GVt energııa qýattaryn iske qosý tapsyryldy.

Sondaı-aq Memleket basshysynyń munaı-gaz jobalaryn keńeıtý, gaz óńdeý zaýyttaryn salý jobalaryn ýaqtyly iske asyrý, munaı ónimderin óndirý jáne ishki naryqty kógildir otynmen qamtý máselelerinde turaqtylyqty qamtamasyz etý jónindegi tapsyrmalaryn oryndaý boıynsha jumystyń basym baǵyttary belgilendi.

Eske sala keteıik, Memleket basshysynyń Jarlyǵymen Erlan Aqkenjenov Qazaqstan Respýblıkasynyń Energetıka mınıstri laýazymyna taǵaıyndalǵan bolatyn.