Eń basty mindet – turǵyndarymyzdyń qaýipsizdigin qamtamasyz etý – Oljas Bektenov
ASTANA. KAZINFORM – Memleket basshysy Qasym-Jomart Toqaevtyń tapsyrmasy boıynsha Premer-Mınıstr, Sý tasqynyna qarsy is-sharalardy úılestirý jáne sý tasqyny kezeńiniń saldaryn joıý jónindegi respýblıkalyq shtabtyń jetekshisi Oljas Bektenov qazirgi kezde sý tasqynyna baılanysty kúrdeli jaǵdaı qalyptasyp otyrǵan Qostanaı oblysynda júr.
Úkimet basshysy sý deńgeıi Qostanaı, Rýdnyı qalalary, B. Maılın, Denısovskıı, Jitiqara aýdandaryndaǵy jaǵdaıǵa tikeleı áser etetin Tobyl ózenin tikushaqpen aralap kórdi.
Sý qoımalarynyń tolý deńgeıi maksımaldy mejege jaqyndap keledi. Máselen, Jelqýar jáne Amangeldi sý qoımalary 100%-ǵa, Qaratomar 97%-ǵa, Joǵarǵy Tobyl 93%-ǵa tolyp otyr, Sergeev jáne Amangeldi sý qoımalary tranzıttik rejımde óz qýatynyń sheginde jumys istep jatyr.
Bul rette sýdyń kelýi ony ótkizý kóleminen asyp túsedi. Jaqyn arada, boljam boıynsha, erigen qar sýynyń jáne joǵarǵy jaqtan keletin sýdyń esebinen sý deńgeıi taǵy da ulǵaıady dep kútilýde. Qostanaı jáne Tobyl qalalaryna irgeles aýmaqtardy sý basýy múmkin.
Oljas Bektenov basty mindet turǵyndarymyzdyń qaýipsizdigin qamtamasyz etý ekenin atap ótti. Premer-Mınıstr jaǵdaıdyń nasharlaýyna jol bermeý úshin jasalyp jatqan sharalarmen tanysty.
Óńirde erigen qar sýyn ótkizý maqsatynda Qostanaı qalasyndaǵy kishi kópir aýdanynda jumys istemeıtin jol tósemi ashyldy, eldi mekenderde arnaıy bógetter salynyp, erigen sýlardy basqa jaqqa burý úshin aryqtar daıyndalýda, topyraq toltyrylǵan qapshyqtar men ınertti materıaldar tóselip, sýdy sorý jáne basqa da jumystar júrgizilip jatyr. Qarasý jáne Tobyl ózenderinde muz jarý jumystary júrgizildi.
Jumystar kúsheıtilgen rejımde júrgizilýde. 2000-ǵa jýyq adam, 650-den astam tehnıka, motopompalar, sondaı-aq júzý quraldary men áýe kemeleri jumyldyryldy.
Óńirde sý tasqyny kezeńi bastalǵannan beri barlyǵy 3257 adam qutqaryldy jáne evakýatsııalandy, ýaqytsha ornalastyrý pýnktterine 632 adam ornalastyrylǵan, qalǵandary óz erkimen týystary men jaqyndarynyń úıine barýǵa sheshim qabyldady. Qosymsha evakýatsııalaý jáne ýaqytsha ornalastyrý pýnktteri tolyq daıyndyq rejıminde.
Jaǵdaı – turaqty baqylaýda.
