Oljas Bektenov elimizde qurastyrylatyn júk kólikteriniń álemdik brendterin atady

ASTANA. KAZINFORM – Elimizde álemdik brendterdiń júk kólikterin shyǵarý qolǵa alyndy. Bul týraly Úkimet otyrysynda Premer-mınıstr Oljas Bektenov aıtty.

j
Foto: Qaraǵandy oblysy ákimdigi

- Importty almastyrý máselesiniń de mańyzdylyǵyn atap ótemin. Qazaqstannyń logıstıkalyq áleýetin damytý jáne otandyq tasymaldaýshylardyń avtoparkin jańartý maqsatynda aýyr júk kólikteriniń halyqaralyq brendterin lokalızatsııalaý baǵytynda aýqymdy jumys júrgizilip jatyr. Búginde HOWO, SITRAK jáne Scania júk kólikterin shyǵarý qolǵa alyndy. Budan bólek, olardyń quramdas bólshekterin lokalızatsııalaýǵa basymdyq berilip otyr, - dedi Úkimet basshysy.

Onyń aıtýynsha, osy jyldyń sońyna deıin Almatyda Volvo júk tartqyshtaryn óndirýdi bastaý josparlanǵan, al Mercedes kompanııasymen kelissózder júrgizilip jatyr. Atalǵan jobalar ýaqytyly júzege asyrylyp, iske qosylýǵa tıis.

- Mundaı jumystardy kepildi suranyspen tıisti qoldaý sharalaryn qamtamasyz ete otyryp, basqa da joǵary tehnologııalyq baǵyttar boıynsha júrgizý qajet, - dedi Oljas Bektenov.

Buǵan deıin Úkimet basshysy qazbalar boıynsha jer qoınaýyn paıdalanýshylardyń otandyq kásiporyndardan taýar satyp alý kórsetkishi nebári 17 paıyzdy qurap otyrǵanyn aıtqan edi.