Oljas Bektenov elimizde dron óndirisin lokalızatsııalaý máselesin qarastyrýdy tapsyrdy
ASTANA. KAZINFORM – Ótken jyly orman órtterinen kelgen materıaldyq zalal 160 mlrd teńgeden asty. Bul týraly Úkimet otyrysynda Premer-Mınıstr Oljas Bektenov aıtty.
«Tabıǵı órt saldarynyń aýyr bolatynyn sońǵy jyldary anyq baıqadyq. Ótken jyly 116 myń gektardan astam orman qory janyp ketti. Orman órtinde 15 adamnan aıyrylyp qaldyq. Ekologııaǵa keltirilgen zııandy eseptemegende, materıaldyq zalaldyń ózi 160 mlrd teńgeden asyp tústi. Prezıdent tapsyrmasyn oryndaý aıasynda tabıǵı órtterdiń profılaktıkalyq sharalary qabyldanýda. Tabıǵı órt kezinde múddeli memlekettik organdar men uıymdardyń áreket etý jáne olardyń ózara is-qımyly jónindegi algorıtm ázirlendi. Tıisti zańnamalyq túzetýler engizilýde», — dedi Úkimet basshysy.
Sonymen qatar Premer-Mınıstr orman mekemelerin materıaldyq-tehnıkalyq jaraqtandyrý jáne órtke tsıfrlyq monıtorıng júrgizý máseleleri áli tolyq sheshimin tappaı otyrǵanyna nazar aýdartty.
«Atap aıtqanda, biz ótken aptada ǵana baryp qaıtqan „Semeı ormany“ rezervatynda orman mekemelerindegi órt sóndirý tehnıkasynyń úshten biri ábden eskirgen, ıaǵnı olardy esepten shyǵarý kerek. Al órtti anyqtaýdyń aqparattyq júıesi aýmaqtyń 33 paıyzyn ǵana qamtıdy. Baıanaýyl ulttyq parkinde órtti erte anyqtaý júıesi múldem joq. Órt sóndirý jáne patrýldik tehnıkalardyń tozyǵy jetken. Zamanaýı tehnıka men quraldardyń bolmaýy qyzyl jalynmen kúreste jedel sharalar qabyldaýdy baıaýlatady. Bul jumysta tsıfrlyq júıelerdi belsendi qoldanǵan jón», — dedi ol.
Onyń atap ótýinshe, ushqyshsyz ushatyn apparattardy keńinen paıdalaný qajet. Olar ormandar men dalany áýeden tolyqqandy tekserip-qaraýǵa múmkindik beredi.
«Jalpy, ekonomıkanyń ártúrli salalarynda paıdalaný úshin pılotsyz ushatyn apparattardyń áleýeti zor. Sondyqtan Ónerkásip mınıstrligi Qazaqstanda drondar óndirisin lokalızatsııalaý máselesin qarastyrýy kerek», — dedi Oljas Bektenov.
