Oljas Bektenov el halqyn jańa Konstıtýtsııanyń qabyldanýymen quttyqtady
ASTANA. KAZINFORM – Ata zań saıası turaqtylyqty nyǵaıtyp, ekonomıka men qoǵamnyń barlyq salasyn odan ári jańǵyrtýǵa jol ashady. Bul týraly Úkimet otyrysynda Premer-mınıstr Oljas Bektenov aıtty.
— Eń aldymen, barsha qazaqstandyqtardy tarıhymyzdaǵy asa mańyzdy oqıǵa — jalpyhalyqtyq referendýmda jańa Konstıtýtsııanyń qabyldanýymen quttyqtaımyn! Bul — Qazaqstannyń zamanaýı tarıhyndaǵy el taǵdyryn aıqyndaıtyn eleýli kezeń. Memleket basshysy Qasym-Jomart Kemeluly Toqaevtyń basshylyǵymen jáne qoǵamnyń belsendi qoldaýymen elimizde júrgizilip jatqan aýqymdy ózgerister Qazaqstannyń kez kelgen syn-qaterlerge tótep berýin qamtamasyz etedi, — dedi Úkimet basshysy.
Onyń atap ótýinshe, Ata zań saıası turaqtylyqty nyǵaıtyp, ekonomıka men qoǵamnyń barlyq salasyn odan ári jańǵyrtýǵa jol ashady. Birlik pen ádildik, Zań men Tártip sııaqty negizgi qundylyqtardy ornyqtyryp, ultymyzdyń uzaq merzimdi damý baǵdaryn aıqyndaıdy.
— Ol elimizdiń saıası ómirine halyqtyń tolyqqandy qatysýyna, azamattardyń quqyqtary men bostandyqtarynyń qorǵalýyna, adam kapıtalynyń, ǵylym men mádenıettiń, tsıfrlyq ortanyń sapaly damýyna, ekologııalyq qaýipsizdiktiń saqtalýyna kepildik beredi. Sonymen qatar quqyqtyq memleket qaǵıdattaryn nyǵaıtý, zań kómegin alý quqyǵyna jáne derbes derekterdiń qorǵalýyna kepildik berý negizgi zań deńgeıinde bekitilip otyr. Prezıdent atap ótkendeı, jańa Konstıtýtsııa eldigimizdiń tiregi, Egemendigimiz ben Táýelsizdigimizdiń tuǵyry bolady, — dedi Oljas Bektenov.
