Oljas Bektenov elektromobıl zaýytyn tezirek ashýdy tapsyrdy
ASTANA. KAZINFORM — Premer-mınıstr Oljas Bektenov Qazaqstanda BYD markaly elektromobıl óndirisin iske qosý jobasyn jedeldetýdi tapsyrdy.
Úkimet basshysy búgingi otyrysta «Astana Motors» kompanııalar tobynyń tóraǵasy Nurlan Smaǵulovtyń esebin tyńdap bolǵannan keıin jobanyń júzege asyrylýyna qyzyǵýshylyq tanytty.
Nurlan Smaǵulovtyń aıtýynsha, kompanııa bıyl BYD markaly avtobýstar óndirisin iske qosý máselesin pysyqtap jatyr. Onyń sózinshe, Qazaqstan delegatsııasynyń Shanhaıǵa saparynda qytaılyq kompanııa basshylyǵymen tıisti kelissózder ótken.
Al BYD jeńil avtokólikteriniń óndirisin kelesi jyly jolǵa qoıý josparlanǵan.
— Jeńil avtokólikterge kelsek, bul jobany jan-jaqty pysyqtadyq. Kelesi jyldan bastap BYD avtokólikterin óndirýdi qolǵa alýdy josparlap otyrmyz. BYD — tek qana elektr jáne gıbrıdti kólikter shyǵaratyn álemdegi jetekshi kompanııalardyń biri. Ýaqytyly berilgen tapsyrma úshin raqmet. Kompanııamyz otandyq naryqtyń suranysyna saı BYD óndirisin jolǵa qoıýǵa daıyn, — dedi Nurlan Smaǵulov.
Óz kezeginde Oljas Bektenov Úkimettiń BYD elektromobılderin shyǵaratyn zaýyttyń Qazaqstanda múmkindiginshe tezirek ashylýyna múddeli ekenin aıtty.
— Biz BYD elektromobılderin óndiretin zaýyttyń Qazaqstanda ashylýyna múddelimiz. Úkimet tarapynan qandaı qoldaý qajet bolsa, barlyǵy kórsetiledi. Osy jobany iske asyrýdy jedeldetýdi suraımyn, — dedi Premer-mınıstr.
Aıta keteıik, Úkimet otyrysynda mashına jasaý salasyn damytý máselesi qaralyp jatyr.
Qazaqstannyń 19 oqý ornynda avtoónerkásip mamandary daıarlanyp jatyr.
