Oljas Bektenov: Ekonomıkanyń ósýin yntalandyratyn shyǵystardyń artýy bıznestiń damýyna qoldaý kórsetedi
ASTANA. KAZINFORM – AMANAT partııasy fraktsııasynyń keńeıtilgen otyrysynda Premer-Mınıstr Oljas Bektenov Úkimet áleýmettik-ekonomıkalyq damý boljamyn jáne aldaǵy úsh jyldyq kezeńge arnalǵan respýblıkalyq bıýdjet jobasyn maquldap, Parlamentke engizgenin málimdedi.
«Bazalyq stsenarıı boıynsha úsh jyl ishinde jalpy ishki ónimniń naqty ortasha jyldyq ósimi 5,3 paıyzdy quraıdy. Nomınaldy jalpy ishki ónim 2026 jyly 183,8 trln teńgeden 2028 jyly 229,8 trln teńgege nemese 425,6 mlrd dollarǵa deıin ósedi. 2026 jyly bıýdjet tapshylyǵy JІÓ-ge shaqqanda 2,5 paıyz deńgeıinde belgilense, 2027–2028 jyldary tıisinshe 1,7 jáne 0,9 paıyzǵa deıin tómendeıdi», – dedi Úkimet basshysy.
Onyń aıtýynsha, salyq reformasynyń nátıjesinde ekonomıkanyń ósýin yntalandyratyn shyǵystar 10,9 paıyzdan 16,1 paıyzǵa deıin artady.
«Sonyń arqasynda biz bıznestiń damýyna ınfraqurylymdyq jáne qarjylyq turǵyda qoldaý kórsete alamyz. Sonymen qatar Memleket basshysy tapsyrǵandaı, bıýdjettiń áleýmettik baǵytyn saqtap, qabyldanǵan áleýmettik mindettemelerdiń tolyq oryndalýyn qamtamasyz etemiz», – dep atap ótti Oljas Bektenov.
Premer-Mınıstr Úkimettiń eldiń ınvestıtsııalyq tartymdylyǵyn arttyrý boıynsha jumystardy jalǵastyryp jatqanyn aıtty. Bıylǵy birinshi toqsanda 6,6 mlrd AQSh dollary kóleminde tikeleı sheteldik ınvestıtsııa tartyldy. Bul kórsetkish ótken jyldyń sáıkes kezeńimen salystyrǵanda 6,2 paıyzǵa joǵary.
Investıtsııanyń negizgi baǵyttary retinde kómir jáne munaı hımııasy, dándi daqyldardy tereń óńdeý, sondaı-aq jabdyqtar óndirisi aıqyndalǵan. Árbir joba boıynsha óńir ákimdikteri aımaqtardyń salalyq erekshelikteri men ınfraqurylymdyq daıyndyǵyn eskere otyryp, «ınvestıtsııaǵa tapsyrys» qalyptastyrady.
«Ótken jyldyń ózinde sheteldik kapıtaldyń qatysýymen jalpy quny 1,3 mlrd dollar bolatyn 45 joba iske qosylyp, 6 myńǵa jýyq jumys orny ashyldy. Jalpyulttyq pýlda shamamen 144 mlrd dollardy quraıtyn 1100-den astam joba bar», – dedi Premer-Mınıstr.
Onyń dereginshe, elimizdegi ónerkásip óndirisiniń ındeksi 6,9 paıyzǵa ósken, onyń ishinde óńdeý ónerkásibi 6,1 paıyzǵa artqan. Negizgi ósimdi mashına jasaý, azyq-túlik, munaı ónimderi jáne hımııa salalary qamtamasyz etýde. Bıylǵy jeti aıda óńdeý salasynyń óndiris kólemi 16,2 trln teńgege jetip, ónerkásiptiń jalpy kólemindegi úlesi 47,3 paıyzdy qurady. Bul – óndirý ónerkásibiniń úlesinen 1,4 paıyzǵa artyq kórsetkish.
«Bıyl óńdeý ónerkásibinde jalpy somasy 1,5 trln teńge bolatyn 190 jobany iske qosý josparlanǵan. Sonyń nátıjesinde 20 myńnan astam jańa jumys orny qurylyp, óndiris kólemi 2,2 trln teńgege jetedi dep kútilýde», – dedi Úkimet basshysy.
Sońǵy úsh jylda elde polıpropılen, ferrosılıtsıı, arnaıy koks, turmystyq tehnıka, avtomobıl shınalary, júk kólikterine arnalǵan qosalqy bólshekter óndirisi iske qosyldy. Tyńaıtqyshtar, qurylys materıaldary, munaı-gaz jabdyqtary men dárilik zattardyń jańa túrlerin shyǵarý jolǵa qoıyldy.
Sonymen qatar joǵary deńgeıde óńdelgen ónim shyǵaratyn klasterler qurýǵa baǵyttalǵan 17 iri joba júzege asyrylýda. Bul jobalar aıasynda otandyq shıkizatty barynsha paıdalaný jáne qosalqy óndiristerdi damytý kózdelgen.
Temir-metallýrgııa salasynda 2024 jyldyń qorytyndysy boıynsha metall kenderin óndirý 7,8 paıyzǵa, al metall óndirisi 6,9 paıyzǵa ósti.
Aıta keteıik, Úkimet TURAN arnaıy ekonomıkalyq aımaq terrıtorııasyn keńeıtti.