Oljas Bektenov Ekonomıkalyq saıasat jónindegi keńestiń otyrysyn ótkizdi

ASTANA. KAZINFORM – Premer-mınıstr Oljas Bektenov Ekonomıkalyq saıasat jónindegi keńestiń otyrysyn ótkizdi. Onda ınflıatsııany tejeý jónindegi sharalar jáne eldiń aldaǵy jyldarǵa arnalǵan áleýmettik-ekonomıkalyq damý boljamynyń parametrleri qaraldy. Bul týraly Úkimettiń baspasóz qyzmeti habarlady.

Ulttyq banktiń málimetinshe, bıylǵy maýsym aıynyń qorytyndysy boıynsha ınflıatsııa jyldyq mánde 11,8% boldy, bul álemdik naryqtyń turaqsyzdyǵy, tarıftik reformalar, tutynýshylyq suranystyń kúsheıýi jáne ınflıatsııalyq joramaldar syndy birqatar syrtqy jáne ishki faktorǵa baılanysty boldy.

Baǵanyń ósýin tejeý maqsatynda Úkimet Ulttyq bankpen jáne jergilikti atqarýshy organdarmen birlesip júıeli jumystar júrgizip jatyr.

Ulttyq banktiń belsendi qatysýymen ınflıatsııany baqylaý jáne tómendetý jónindegi qysqa ári uzaqmerzimdi qamtıtyn sharalar kesheni qalyptastyryldy. Qujat qaraýdyń sońǵy satysynda tur jáne Úkimettiń jeke qaýlysymen qabyldanady. Negizgi baǵyttardyń qataryna ishki óndiristi ulǵaıtý, tarıftik saıasattyń boljamdylyǵyn arttyrý, bazalyq taýarlarǵa baǵany turaqtandyrý jáne ınflıatsııalyq kútýlerdi tómendetý jatady. Sondaı-aq otandyq óndiristi qoldaý, ishki naryqty qanyqtyrý jáne saýda ústemelerin baqylaý jalǵasyp jatyr.

Ulttyq ekonomıka mınıstrliginiń aqparaty boıynsha, jyl basynan beri 15% shekti saýda ústemesin asyrǵany úshin 1 847 ákimshilik qaýly shyǵarylǵan. Jaýapkershilik kúsheıtilgen – eskertýlerdiń ornyna aıyppuldar qarastyrylǵan. Retteletin kommýnaldyq qyzmetterge tarıfterdiń negizsiz ósýine jol bermeý boıynsha da jumystar júrgizilip jatyr. Jyl basynan beri osy baǵyt boıynsha ınflıatsııaǵa jıyntyq úles 0,5 paıyzdyq tarmaqshany quraǵan.

Jalpy, 2023 jyly sharalar keshenin júzege asyrý ınflıatsııalyq qysymdy 4,16 paıyzdyq tarmaqshaǵa, 2024 jyly 2,3 paıyzdyq tarmaqshaǵa tómendetýge múmkindik bergeni atap ótildi. Qazirgi ýaqytta sharalar kesheni ózektendirilip, 2026 jylǵa deıin uzartyldy.

Saýda jáne ıntegratsııa mınıstrliginiń málimetinshe, Qazaqstan ÁMAT boıynsha básekelestik baǵany saqtap otyr: sıyr etiniń quny EAEO jáne Ortalyq Azııa elderine qaraǵanda 30%, kartop pen sábiz 38%, pııaz 47%, qyryqqabat 50% tómen. Osy jyldyń basynan bastap naryqtyq baǵadan tómen baǵamen 3 myńnan astam aýyl sharýashylyǵy taýarlary jármeńkesi ótkizildi. Salalyq odaqtarmen memorandýmdarǵa qol qoıyldy, sonyń nátıjesinde jumyrtqa baǵasy 8,7%-ǵa tómendedi.

Maýsymnan tys ýaqytta baǵany turaqtandyrý úshin 30,3 myń jetkizip berý kelisimsharttary jasaldy. Qytaıdan, Pákistannan jáne Ózbekstannan birneshe tonna erte pisetin kókónister jetkizildi. Ónimderdi, onyń ishinde kartopty, analyq maldy jáne buqashyqtardy elden áketýge shekteýler engizildi.

Aýyl sharýashylyǵy mınıstri Aıdarbek Saparov 2025 jyldyń qańtar-mamyr aılarynda aýyl sharýashylyǵy óniminiń kólemi 4%-ǵa ósip, 1,3 trln teńgeni quraǵanyn baıandady. Azyq-túlik óndirisi 10,5%-ǵa ósti. Aýyl sharýashylyǵy ónimderin qaıta óńdeýdi damytýdyń 2028 jylǵa deıingi Keshendi jospary iske qosyldy, 677 ınvestıtsııalyq joba, onyń ishinde ımportqa táýeldi taýarlar boıynsha 289 joba júzege asyrylyp jatyr.

Birqatar áleýmettik mańyzy bar taýarlarǵa baǵanyń ósýi baıqalyp otyr. Olar – kúnbaǵys maıy, sıyr eti, qoı eti men kartop. Kúnbaǵys maıy boıynsha naqty sharalar qabyldanyp jatyr: 2024 jyly onyń óndirisi 15%-ǵa ulǵaıdy, bul ishki qajettilikten eki ese kóp. Bıylǵy 6 aıda óndiris kólemi 388 myń tonnany qurady, bul ótken jyldyń sáıkes kezeńinen 21,3%-ǵa artyq. Qańtar-naýryz aılarynda 294 myń tonna maı eksporttaldy, osylaısha ótken jylmen salystyrǵanda ol 41%-ǵa ósti. Qazirgi ýaqytta elimizde jalpy qýattylyǵy 421 myń tonna bolatyn 5 iri qaıta óńdeý zaýytynyń qurylysy júrip jatyr.

Jıyn sońynda Premer-mınıstr Oljas Bektenov ınflıatsııaǵa qarsy saıasat júıeli ári tıimdi bolýy tıis ekenin atap ótti. Qabyldanǵan sharalar boıynsha Úkimet pen Ulttyq bank kelise otyryp is-qımyl jasaý kerektiginiń mańyzdylyǵyna basa nazar aýdaryldy.

– Inflıatsııany tómendetý mindeti óte mańyzdy jáne keshendi kózqarasty qajet etedi. Úkimet Ulttyq bankpen birlesip qabyldanǵan sharalardy júzege asyrýdy jalǵastyra bermek jáne maqsatty baǵdarlarǵa qol jetkizýge kezeń-kezeńimen umtylatyn bolady, - dep atap ótti Oljas Bektenov.

Aıta keteıik, Ekonomıka mınıstri jańa ekonomıkalyq saıasattyń basymdyǵyn atady.