Oljas Bektenov Ekonomıkalyq saıasat jónindegi keńes otyrysyn ótkizdi

ASTANA. KAZINFORM — Premer-mınıstr Oljas Bektenovtiń tóraǵalyǵymen ótken Ekonomıkalyq saıasat jónindegi keńes otyrysynda Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty halyqqa Joldaýynda berilgen tapsyrmalaryn júzege asyrý sharalary qaraldy. Bul týraly Úkimettiń baspasóz qyzmeti habarlady.

Makroekonomıkalyq saıasattyń tepe-teńdigin jaqsartý úshin aqsha-nesıe jáne fıskaldyq saıasat arasyndaǵy teńgerimdi qamtamasyz etý tásilderi talqylandy.

Naryq tetikteri negizinde memlekettik qarjy turaqtylyǵyn jáne ekonomıkanyń ósý sapasyn arttyrýǵa basa nazar aýdarylýda. Bıýdjettik erejeler men nysanaly baǵdarlar júıesiniń saqtalýyn ınstıtýtsıonaldy túrde nyǵaıtý, ekonomıkany qarjylandyrýdaǵy jeke sektordyń rólin arttyrý, qarjy sektoryndaǵy júıelik táýekelderdi tómendetý boıynsha usynystar tyńdaldy.

Jıynǵa Ulttyq bank tóraǵasy Tımýr Súleımenov, Premer-mınıstrdiń orynbasary – ulttyq ekonomıka mınıstri Serik Jumanǵarın, Prezıdenttiń ekonomıkalyq máseleler jónindegi kómekshisi Qanat Sharlapaev, Qarjy naryǵyn retteý jáne damytý agenttiginiń tóraǵasy Mádına Ábilqasymova, Strategııalyq josparlaý jáne reformalar agenttiginiń tóraǵasy Áset Erǵalıev, sondaı-aq jaýapty mınıstrlikter basshylyǵy qatysty.