Oljas Bektenov «Egmont» qarjylyq barlaý bólimsheleri toby atqarýshy hatshysy Jerom Bomonmen kezdesti

ASTANA. KAZINFORM – Qazaqstan Respýblıkasynyń Premer-mınıstri Oljas Bektenov «Egmont» qarjylyq barlaý bólimsheleri tobynyń atqarýshy hatshysy Jerom Bomonmen kezdesý ótkizdi. Bul týraly Úkimettiń baspasóz qyzmeti habarlady.

Qazaqstan Prezıdenti Qasym-Jomart Toqaevtyń uıym tóraǵasy Eljbeta Frankov-ıAskevıchpen kelissózderi barysynda buryn belgilengen baǵyttar sheńberindegi yntymaqtastyq máseleleri talqylandy.

Aktıvterdi qaıtarý men qarjylyq barlaýdyń tıimdiligin arttyrýdy qosa alǵanda, kiristerdi zańsyz shyǵarýǵa jáne terrorızmdi qarjylandyrýǵa qarsy is-qımyl salasyndaǵy birlesken áreket tetikteri qaraldy.

Jerom Bomon Qazaqstanda júrgizilip jatqan reformalardy joǵary baǵalady jáne seriktestikti damytýǵa daıyn ekenin bildirdi.

Oljas Bektenov «Egmont» tobynyń qarjylyq qaýipsizdikti qamtamasyz etýdegi negizgi halyqaralyq platforma retindegi mańyzdylyǵyn atap ótti jáne Qazaqstannyń kiristerdi zańsyz shyǵarýǵa, terrorızmdi qarjylandyrýǵa qarsy is-qımyl salasyndaǵy halyqaralyq standarttarǵa beıildi ekenin rastady.

Kezdesý qorytyndysy boıynsha qatysýshylar jahandyq qarjylyq turaqtylyqty qamtamasyz etý maqsatynda ózara is-qımyldy odan ári nyǵaıtýdyń mańyzdylyǵyn atap ótti.

Anyqtama: «Egmont» toby – álemniń 182 ıýrısdıktsııasynyń halyqaralyq birlestigi. Uıym óz múshelerine arnaıy qorǵalǵan baılanys arnasy arqyly aqparat almasý múmkindigin usynady. 2023 jyldan bastap Qazaqstan «Egmont» qurylymynda óńirlik ókil qyzmetin atqarady.

Aıta keteıik, Oljas Bektenov jerde sırek kezdesetin metaldar salasyn damytý jóninde keńes ótkizdi.