Oljas Bektenov: EAEO aıasynda jasandy ıntellekt pen kedergisiz saýdaǵa basymdyq beriledi
ASTANA. KAZINFORM — Oljas Bektenov Sholpan-Atada Eýrazııalyq úkimetaralyq keńestiń shaǵyn quramdaǵy otyrysyna qatysty. Bul týraly Úkimettiń baspasóz qyzmeti habarlady.
Sholpan-Ata qalasynda (Qyrǵyzstan) Qazaqstan Respýblıkasynyń Premer-mınıstri Oljas Bektenovtiń tóraǵalyǵymen Eýrazııalyq úkimetaralyq keńestiń shaǵyn quramdaǵy otyrysy ótti.
Jıynǵa Armenııa, Belarýs premer-mınıstrleri, Qyrǵyzstan Mınıstrler kabınetiniń tóraǵasy — Prezıdent Ákimshiliginiń basshysy, Reseı Federatsııasy Úkimetiniń tóraǵasy, Eýrazııalyq ekonomıkalyq komıssııa alqasynyń tóraǵasy qatysty.
EAEO-ǵa múshe memleketterdiń basshylary aımaqtyń makroekonomıkalyq turaqtylyǵyn saqtaý jáne ekonomıkalyq áleýetin arttyrý, halyqtyń ómir súrý sapasyn jaqsartý, ózara saýdany damytý, Birlestik elderi naryǵyndaǵy kedergilerdi joıý jóninde mindetter qoıyp otyr.
— Qazaqstan Respýblıkasynyń Eýrazııalyq ekonomıkalyq odaq organdaryna tóraǵalyq etýi aıasynda biz jasandy ıntellektini damytyp, logıstıkalyq habtar qurý, ónerkásip jáne agroónerkásip keshenin tsıfrlandyrý, kedergisiz saýdany qamtamasyz etý, sondaı-aq syrtqy seriktestermen jahandyq dıalog qurý baǵytyn dáıekti túrde qoldaımyz. Dál osy ustanymdy Qazaqstan Respýblıkasynyń Prezıdenti Qasym-Jomart Kemeluly Toqaev Odaqqa múshe memleketterdiń basshylaryna joldaýynda belgilegen bolatyn. Búgingi otyrys qorytyndysy boıynsha qol jetkizilgen ýaǵdalastyqtar EAEO sheńberinde alǵa qoıylǵan maqsattardy júzege asyrýǵa jáne ózara tıimdi yntymaqtastyqty odan ári nyǵaıtýǵa eleýli úles qosatynyna senimdimin, — dep atap ótti Oljas Bektenov.
Shaǵyn quramdaǵy otyrysta múshe memleketterdiń azyq-túlikpen qamtamasyz etilýi jáne EAEO-nyń negizgi saýda áriptesterimen saýda-ekonomıkalyq yntymaqtastyqty odan ári damytý máseleleri qaraldy. Qatysýshylar EAEO memleketteri taýarlarynyń jańa naryqtarǵa shyǵýy úshin qolaıly jaǵdaılar jasaý jóninde pikir almasty.
Qazaqstan Premer-mınıstri bıylǵy mamyr aıynda Astanada ótken Joǵary Eýrazııalyq ekonomıkalyq keńestiń otyrysynda memleketter basshylary qol qoıǵan AÓK salasyndaǵy qarjylyq járdemdesýdiń jańa tetigi aýyl sharýashylyǵy ónimderin óndirýdiń oń serpinin qoldaýǵa ǵana emes, ózara saýdany damytýǵa, birlesken kooperatsııalyq jobalardy yntalandyrýǵa múmkindik beretinin atap ótti.
EÚAK otyrysynyń jumysy keńeıtilgen quramda jalǵasady.
Aıta ketelik Qazaqstan EAEO-nyń biryńǵaı tsıfrlyq akkredıtteý keńistigin qalyptastyrýdy usynǵany týraly jazǵan edik.
