Oljas Bektenov dıqandarǵa jeńildetilgen otynnyń jetkizilýin baqylaýda ustaýdy tapsyrdy
ASTANA. KAZINFORM – Kóktemgi dala jumystary kezinde agrotehnologııalyq talaptar belgilengen normalarǵa sáıkes múltiksiz oryndalýǵa tıis. Bul týraly Úkimet otyrysynda Premer-mınıstri Oljas Bektenov aıtty.
- Memleket basshysynyń konstıtýtsııalyq reformasy elimizdi odan ári jańǵyrtýǵa, onyń ishinde ekonomıkanyń barlyq salasyn damyta otyryp, halyqtyń ál-aýqatyn arttyrýǵa baǵyttalǵan. Osy oraıda azyq-túlik qaýipsizdigin kúsheıtý jáne ımportqa táýeldilikti azaıtý óte ózekti másele. Qazirgi tańda basty mindet – egis naýqanyn sapaly júrgizý, - dedi Úkimet basshysy.
Onyń aıtýynsha, Úkimet tarapynan barlyq qajetti jaǵdaı jasaldy. Qarajat bólindi, fermerlerdi tehnıkamen jáne resýrstarmen qamtamasyz etý sharalary qabyldandy.
- Agrotehnologııalyq talaptar belgilengen normalarǵa sáıkes múltiksiz oryndalýǵa tıis. Bıyl 2,3 mln tonna tyńaıtqysh sebý jáne elıtalyq tuqymdardyń úlesin 1,7 paıyzǵa deıin jetkizý jospary bekitildi. Atalǵan kórsetkishterge tolyq kólemde qol jetkizý kerek. Sonymen qatar ósimdikterdi qorǵaý sharalaryn ýaqtyly júrgizip, egis alqaptaryn ártaraptandyrý jumysyn jalǵastyrý mańyzdy. Jeńildetilgen otynnyń jetkizilýin jáne onyń maqsatty paıdalanylýyn turaqty baqylaýda ustaý qajet, - dedi Premer-mınıstr.
Aıta keteıik, bıyl kóktemgi dala jumystaryna 402 myń tonna dızel arzandatylǵan baǵamen beriledi.
