«Turan» stansasy, LRT jáne depo: Oljas Bektenov ınfraqurylymdyq jobalardy tekserdi
ASTANA. KAZINFORM - Premer-mınıstr Oljas Bektenov Astana qalasy boıynsha jumys sapary aıasynda Memleket basshysynyń halyqty jylýmen qamtamasyz etý jáne LRT jobasyn iske asyrý jónindegi tapsyrmalarynyń oryndalý barysyn tekserdi. Bul týraly Úkimettiń baspasóz qyzmeti habarlady.
«Turan» gaz jylý stansasynda Premer-mınıstrge nysan qurylysynyń ekinshi kezegi aıaqtalǵany týraly baıandaldy. Búginde daıyndyq 98% bolyp otyr. Júrgizilgen jumystardyń nátıjesinde GJS jalpy qýaty saǵatyna 350-den 600 Gkal-ǵa deıin jetkizildi – búginde bul elimizdegi eń iri gaz jylý stansasy. «Turan» GJS basqa 4 jylý kózi: JEO-1, JEO-2, JEO-3, «Ońtústik-Shyǵys» gaz jylý stansasymen elordany jylýmen qamtamasyz etedi. Nysandardyń jalpy qoljetimdi qýaty saǵatyna 4 104 Gkal, qalanyń eń joǵary jylý tutyný qajettiligi 3 578 Gkal/saǵ, bul aǵymdaǵy jylytý kezeńinde jylý qýatyn shamamen 500 Gkal/saǵ artyǵymen óndirýdi qamtamasyz etti.
Qala ákiminiń orynbasary Ersin Ótebaev búginde «Turan» GJS jumysy tolyǵymen avtomattandyrylǵanyn aıtty. Mamandardy daıarlaý oqý ortalyǵynyń bazasynda dýaldy bilim berý sheńberinde júrgiziledi. Stansada nemis, orys jáne fın tehnologııalary qoldanylady. GJS joǵary ekologııalyq taza ekendigi atap ótildi: azot oksıdi qaldyqtary qoldanystaǵy normatıvtermen salystyrǵanda 3-5 ese azaıdy.
Qazir nysan Esil jáne Nura aýdandaryn, sondaı-aq shamamen 2 mln sharshy metr alańdaǵy áleýmettik jáne ónerkásip nysandaryn jylýmen qamtamasyz etedi. Gaz tartý jáne qalany jylýmen qamtamasyz etý jumystary jalǵasady. 2035 jylǵa deıin jylýmen jabdyqtaý salasynda JEO-2-de 7, 8 qazandyqtardy paıdalanýǵa berýdi, «Telman» GJS jáne «Ońtústik-Batys» GJS salýdy qosqanda, jalpy qýaty saǵatyna 1310 Gkal bolatyn birqatar jobany júzege asyrý josparlanyp otyr.
Oljas Bektenov halyqtyń belsendi ósýi jáne qalalyq ınfraqurylymnyń keńeıýi jaǵdaıynda qazirgi zamanǵy jylýmen jabdyqtaý kózderiniń qurylysy erekshe mańyzǵa ıe ekendigin atap ótti.
Premer-mınıstrge elordanyń LRT qurylysy boıynsha negizgi kólik jobalarynyń birin iske asyrý barysy týraly 112-stansa alańynda baıandaldy. Ótken jyldyń qorytyndysy boıynsha estakada, aspaly kópir jáne barlyq stansanyń temirbeton konstrýktsııalarynyń qurylysy aıaqtaldy. Jobanyń qajettilikterin qamtamasyz etý úshin Astanada shpaldar óndirisi iske qosyldy. Olardy daıyndaý úshin B-55 markaly beton qoldanylady, armatýranyń aldyn ala kerneý tehnologııasy qoldanylady, bul tasymaldaý kezinde qurylymdardyń jarylyp ketýine jol bermeıdi jáne aıazǵa tózimdiligin arttyrady. Búginde 35 myńnan astam shpal daıyndaldy, jobaǵa barlyǵy 87,6 myń birlik shpal qajet.
Qazirgi ýaqytta nysanda relster tóselýde – uzyndyǵy 2 shaqyrym bolatyn ýchaskede, sondaı-aq optıkalyq talshyqta jumys aıaqtaldy. Bıyl jumysqa 2 myńǵa jýyq adam jumyldyryldy, jaz mezgilinde nysanǵa 5 myńǵa jýyq maman tartylatyn bolady.
«CTS» JShS basqarma tóraǵasy Asylbek Dúısebaev 25 qazanda LRT-ny testilik rejımde iske qosý, ıaǵnı jolaýshysyz poıyzdardy synaqtan ótkizý josparlanyp otyrǵanyn habarlady. Astanadaǵy jeńil relsti kólik jobasy ozyq GoA4 standartyna sáıkes júzege asyrylyp jatyr, bul 6 aılyq synaq merzimin talap etedi.
Sonymen qatar Premer-mınıstrge LRT boıyndaǵy aýmaqty abattandyrý jobasy tanystyryldy. Áýejaıdan Rysqulov kóshesine deıin iri aǵashtar men kópjyldyq butalar otyrǵyzylyp, avtomatty sýarý júıesin ornatý josparlanǵan. Qabanbaı batyr dańǵyly boıymen Syǵanaq kóshesine deıingi aýmaq balalar jáne sport alańdary, jaıaý júrginshiler joldary qoǵamdyq keńistikterge bólingen. Ári qaraı jolaýshylar aǵyny belsendi 2-temirjol vokzalyna deıin keń avtoturaqtar, velosıpedke arnalǵan joldar jasalyp, kógaldandyrý qarastyrylǵan.
Oljas Bektenov deponyń basqarý ortalyǵy aýmaǵynda qurylys-montaj jumystarynyń barysymen tanysty. Joba qytaılyq seriktes China Railway Asia-Europe Construction Investment Co., Ltd. kompanııasymen birlesip júzege asyrylyp jatyr. Tolyq avtomattandyrylǵan depo quramdardy turaqqa qoıýǵa jáne jóndeýge, materıaldar men qosalqy bólshekterdi saqtaýǵa arnalǵan 13 negizgi ǵımarattan quralǵan. Sondaı-aq munda dıspetcherlik pýnkt, baılanys toraby jáne LRT paıdalanýshy kompanııanyń ákimshilik keńsesi bar barlyq qoǵamdyq kólik túrlerin basqaratyn ortalyq salynyp jatyr.
Depo alańynda LRT-ǵa arnalǵan jyljymaly quramdy óndirýshi CRRC Tangshan Co.,Ltd. zaýytymen beınebaılanys arqyly tikeleı qosylym boldy. Premer-mınıstrge LRT boıymen jolaýshylardy tasymaldaıtyn lokomotıvterdiń erekshelikteri baıandaldy. Barlyǵy 650 orynǵa eseptelgen 19 tórt sektsııaly quram jumys isteıtin bolady.
Tangshan CRRC Group kompanııasynyń basqarma tóraǵasy Chjoý Tszıýnıan qazirgi ýaqytta óndiriste saǵatyna 350 km/saǵ deıin joǵary jyldamdyqty poıyzdar óndirisindegi tehnologııalar men standarttardy qoldana otyryp, alǵashqy eki quramdy qurastyrý jumystary júrgizilip jatqanyn atap ótti.
Jasaý protsesinde zamanaýı materıaldar, mysaly, korpýs bólshekterine arnalǵan alıýmınıı qorytpasy, serpimdi dóńgelekter, jaıly júrý úshin kóp qabatty terezeler, asa berik organosılıkattan jasalǵan bylǵary oryndyqtar sııaqty zamanaýı materıaldar qoldanylady.
Qurastyrý tikeleı qurylys alańynda júrgiziledi. Ár quram 36 joǵary sapaly monıtormen, 11 kameramen jáne poıyzdardy avtomatty basqarý júıelerimen jabdyqtalady.
Oljas Bektenov avıaotyn naryǵyn damytý máseleleri boıynsha keńes ótkizgenin jazǵan bolatynbyz.