Oljas Bektenov COP31-de Qazaqstannyń 2 mlrd aǵash egý josparyn tanystyrdy
ASTANA. KAZINFORM — Premer-mınıstr Oljas Bektenov COP31 sammıtinde Qazaqstannyń «Taza Qazaqstan» bastamasy, 2 mlrd aǵash otyrǵyzý jospary, sý qaýipsizdigi jáne jasyl energetıkany damytý baǵytyndaǵy basymdyqtaryn tanystyrdy. Bul týraly Úkimet málim etti.
COP alańynda jyl saıyn turaqty damý jáne klımattyń ózgerýi salasyndaǵy jahandyq yntymaqtastyq máseleleri talqylanady. Bıyl Sammıtke álemniń 70-ten astam eliniń memleket basshylary men úkimet jetekshileri, iri halyqaralyq uıym men qarjy ınstıtýttarynyń basshylary qatysyp jatyr.
Oljas Bektenov óz sózinde Prezıdenttiń «Taza Qazaqstan» bastamasy jalpyulttyq qozǵalysqa aınalyp, Konstıtýtsııada tıisti túrde bekitilgenin atap ótti. Memleket basshysy atap ótkendeı, Taza Qazaqstandy qurý - árbir azamattyń paryzy. Búginde 6 mln-nan astam qazaqstandyq týǵan ólkeni qorǵaý isine atsalysýda. Búkil elimiz boıynsha bes jyl ishinde shamamen 1,7 mıllıard aǵash otyrǵyzyldy. 2027 jylǵa taǵy 270 mln kóshet otyrǵyzý josparlanǵan, bul Prezıdent qoıǵan 2 mlrd aǵash egý mindetine qol jetkizýge múmkindik beredi.
Birikken Ulttar Uıymynyń Qazaqstan kótergen bastamany halyqaralyq deńgeıde quptap, 22 sáýirdi Halyqaralyq jer sharyn kógaldandyrý kúni dep jarııalaýynyń erekshe mańyzdylyǵy atap ótildi. Bul tabıǵatty qorǵaýǵa baǵyttalǵan dáıekti kúsh-jigerdiń eleýli nátıje beretinin naqtylaı túsedi.
— Ekologııalyq máselelerdi sheshý úshin ózara tyǵyz yntymaqtastyqty nyǵaıtý qajet. Bıyl sáýir aıynda Astanada birinshi Óńirlik ekologııalyq sammıt ótti. Jıyn qorytyndysy boıynsha qabyldanǵan Ortalyq Azııanyń ekologııalyq yntymaqtastyǵy jónindegi Astana deklaratsııasy birlesken is-qımyldardyń negizin qalady. Osynaý ortaq nıettestik baǵytynda biz úshin anaǵurlym ózekti basymdyqtardyń biri – sý qaýipsizdigin qamtamasyz etý. Sondyqtan Memleket basshysy BUU aıasynda Halyqaralyq sý uıymyn qurý bastamasyn kóterdi. Biz barlyq múddeli seriktesterdi osy protseske qatysýǵa shaqyramyz, — dep atap ótti Premer-mınıstr.
Energetıka salasynda Qazaqstan jańartylatyn energııa kózderin damytýdy jalǵastyrýda, olardyń úlesi sońǵy alty jylda tórt esege artyp, 2026 jylǵy jaǵdaı boıynsha 8%-ǵa jetti. 2030 jylǵa qaraı kórsetkishti 15%-ǵa deıin arttyrý josparlanýda. Sonymen qatar atom energetıkasy, jel jáne kún energetıkasy, «jasyl» sýtegi óndirisi jobalary belsendi damyp keledi. Qazaqstan, Ázerbaıjan jáne Ózbekstannyń ekologııalyq taza elektr energııasyn eksporttaý úshin «jasyl» energetıkalyq dáliz qurý jónindegi birlesken jobasynyń mańyzdylyǵy atap ótildi.
Halyqaralyq yntymaqtastyqty damytýǵa baǵyttalǵan perspektıvaly jobalardyń qatarynda tómen kómirtekti qala qurýdy kózdeıtin Alatau City jobasy tanystyryldy. Qazaqstan tabıǵı qaýip-qaterlerdi boljaý jáne tótenshe jaǵdaılardyń aldyn alý maqsatynda jasandy ıntellekt pen ǵaryshtyq monıtorıng tehnologııalaryn engizýde. Sóz sońynda Premer-mınıstr Qazaqstannyń klımat salasyndaǵy halyqaralyq yntymaqtastyqty keńeıtýge daıyndyǵyn rastady.
Eske sala keteıik, buǵan deıin «Taza Qazaqstan» jalpyulttyq baǵdarlamasy aıasynda elordada «Ulttyq aǵash egý kúnderi» aıasynda 100 túp aǵash egildi.
