Oljas Bektenov China Tianying Inc. kompanııasynyń prezıdenti Debıao Tsaomen kezdesti
ASTANA.KAZINFORM - Premer-mınıstr Oljas Bektenov China Tianying Inc. kompanııasynyń prezıdenti ári partııa komıtetiniń hatshysy Debıao Tsaomen kezdesti. Júzdesý barysynda turmystyq qatty qaldyqtardy qaıta óńdeý jáne energetıkalyq kádege jaratý salasyndaǵy ınvestıtsııalyq jobalardy júzege asyrý máseleleri talqylandy. Bul týraly Úkimettiń baspasóz qyzmeti habarlady.
- Eki el kóshbasshylary Qasym-Jomart Toqaev pen Sı Tszınpın arasyndaǵy senimge negizdelgen syndarly dıalogtiń arqasynda ekijaqty yntymaqtastyq ekonomıkanyń barlyq salasynda qarqyndy damyp, jańa deńgeıge kóterilýde. Ótken jyldyń qorytyndysy boıynsha Qazaqstan men Qytaı arasyndaǵy taýar aınalymy $48 mlrd-qa jetti. Úkimet eki memleket basshylary aıqyndaǵan ózara saýda kólemin eki esege arttyrý jónindegi mindetterdi oryndaý úshin bar kúsh-jigerin jumyldyryp jatyr, - dep atap ótti Oljas Bektenov.
Búgingi tańda Qazaqstan men Qytaı yntymaqtastyǵy aıasynda jalpy quny $13,3 mlrd-ty quraıtyn 77 birlesken joba júzege asyrylyp, 21,6 myńnan astam jumys orny ashyldy. Sonymen qatar jalpy sany 269-dan astam bastama keleshegi zor jobalar portfeline engizilgen.
Qaldyqtardy energetıkalyq kádege jaratý belsendi damyp kele jatqan baǵyttar qataryna jatady. Qazirgi ýaqytta Qazaqstanda Astana, Almaty jáne Shymkent qalalarynda osyndaı zaýyttar salý boıynsha jobalar júzege asyrylýda. Sondaı-aq óńirlerde Waste-to-energy tetigi engizilýde. China Tianying kompanııasy bul salada 20 jyldan astam ýaqyttan beri jumys isteıdi, ózindik tehnologııalyq jáne óndiristik áleýetke ıe. Kompanııa qyzmeti Sıngapýr, Maldıv araldary, Frantsııa sııaqty álemniń 30-dan astam elin qamtıdy.
China Tianying Inc. kompanııasynyń basshysy Debıao Tsao kompanııanyń óndiristik qýaty men tehnologııalyq sheshimderi ekologııa salasyndaǵy ozyq eýropalyq standarttarǵa sáıkes keletinin atap ótti.
- Biz eki negizgi baǵytta jumys isteımiz: qorshaǵan ortany qorǵaý jobalaryn júzege asyrý jáne jańa energetıka salasyndaǵy tehnologııalardy damytý. Qazirgi ýaqytta kompanııa zaýyttarynyń qatty turmystyq qaldyqtardy óńdeý qýaty táýligine 4 myń tonnany quraıdy. Aldaǵy ýaqytta bul kórsetkish táýligine 7 myń tonnaǵa deıin artatyn bolady. Kompanııa tehnıkalyq sheshimderdi ázirleý, jabdyqtardy óndirýden bastap, qurylys jumystaryn júrgizý, nysandardy paıdalanýǵa berý jáne olardy keıingi servıstik qyzmetpen qamtamasyz etýge deıingi tolyq óndiristik tsıkldi júzege asyrady, - dedi Debıao Tsao.
Kezdesý barysynda Qazaqstanda táýligine 250-den 500 tonnaǵa deıingi qaldyqtardy óńdeıtin shaǵyn qýatty zaýyttar salý perspektıvalaryna erekshe nazar aýdaryldy. Mundaı sheshimder kommýnaldyq qaldyqtardyń kólemi iri kásiporyndar salýdy qajet etpeıtin óńirler úshin asa ózekti.
Búgingi tańda Qazaqstanda qatty turmystyq qaldyqtardy óńdeý boıynsha jobalar Investıtsııalar týraly kelisimder tetigi arqyly júzege asyrylýda. Energetıkalyq kádege jaratý jobalary úshin óndiriletin elektr energııasyna 1 kVt/saǵ úshin 55 teńgege deıin tarıf belgilendi.
Kezdesý qorytyndysy boıynsha Premer-mınıstr memlekettik organdarǵa óńirlerde zamanaýı ekologııalyq jáne energetıkalyq tehnologııalardy engizý boıynsha aıtylǵan bastamalardy ýaqytyly júzege asyrý úshin ınvestıtsııalyq jobany súıemeldeýge járdemdesýdi tapsyrdy.
- Ekologııa mınıstrligi ózge de múddeli memlekettik organdarmen birlesip, kompanııamen kelissózderdiń sońǵy kezeńin jedeldetilgen tártippen júrgizýi jáne eki apta ishinde Qazaqstannyń keminde úsh iri qalasynda turmystyq qatty qaldyqtardy kádege jaratý zaýyttaryn salýdy kózdeıtin Investıtsııalar týraly kelisimdi bekitýge usynýy tıis, - dep tapsyrdy Oljas Bektenov.
Aıta keteıik, ótken jyly qytaı kompanııalarymen Investıtsııalar týraly kelisimder jasaldy jáne búgingi tańda úsh qalada jalpy quny 293,3 mlrd teńge bolatyn qaldyqtardy energetıkalyq kádege jaratý salasynda zaýyttar qurylysy bastaldy. Jalpy qýaty táýligine 4,5 myń tonna qaldyqty quraıtyn nysan 134 MVt elektr energııasyn óndirip, 300-den astam turaqty jumys ornyn ashady.
Almatyda Junxin Environmental Protection kompanııasymen birlesip táýligine 2000 tonna kommýnaldyq qaldyqtardy (jylyna 730 myń tonna) kádege jaratý jáne 60 MVt elektr energııasyn óndiretin zaýyttyń qurylysy júrgizilip jatyr. Investıtsııa kólemi – 145,5 mlrd teńge.
Astanada EAST HOPE kompanııasy táýligine keminde 1500 tonna kommýnaldyq qaldyqtardy (jylyna 550 myń tonna) energetıkalyq kádege jaratýdy jáne keıinnen 50 MVt elektr energııasyn óndirýdi kózdeıtin jobany júzege asyryp jatyr. Tartylǵan ınvestıtsııalardyń jalpy somasy 94,4 mlrd teńge.
Shymkent qalasynda Shaanxi Construction Engineering Kazakhstan Co., Ltd táýligine 1000 tonna kommýnaldyq qaldyqtardy (jylyna 360 myń tonna) kádege jaratý, keıinnen 24 MVt elektr energııasyn óndiretin zaýyt salynyp jatyr. Shamamen 54 mlrd teńge ınvestıtsııa tartyldy.
Qazirgi tańda Aqtóbe, Atyraý, Qaraǵandy jáne elimizdiń basqa da qalalarynda osyndaı jobalar qarastyrylyp jatyr.
Qazaqstan men Qytaı arasyndaǵy júk tasymalynyń kólemi 9%-ǵa artqanyn jazǵan edik.
