Oljas Bektenov BUU Tsıfrlyq sheshimder ortalyǵyn Qazaqstanda ashýdy usyndy
ASTANA. KAZINFORM – QR Premer-Mınıstri Oljas Bektenov Astanada tsıfrlyq ınklıýzııa jáne transformatsııa boıynsha Ortalyq Azııadaǵy alǵashqy Azııa-Tynyq muhıty konferentsııasynda BUU Tsıfrlyq sheshimder ortalyǵynyń Qazaqstanda ashylýyna qoldaý kórsetýge shaqyrdy.
«Birikken Ulttar Uıymynyń bizdiń óńirdegi ornyqty damý maqsattaryna qol jetkizý úshin «eshkim nazardan tys qalmaýǵa tıis» qaǵıdatyn atap ótý mańyzdy. Sondyqtan, tsıfrlyq ınklıýzııa – alǵa qoıylǵan maqsattarǵa jetýdiń birden bir mańyzdy elementi. Yntymaqtastyq, bilim almasý jáne eń jaqsy tájirıbeler arqyly ǵana biz bárine birdeı turaqty jáne jarqyn bolashaqty qamtamasyz ete alamyz», - dedi Oljas Bektenov konferentsııanyń ashylý saltanatynda.
Úkimet basshysy Qazaqstannyń óz tájirıbesimen jáne bilimimen bólisýge daıyn ekenin basa aıtty.
«Sondyqtan áriptesterimdi Azııa-Tynyq muhıty óńirinde turaqty damýy úshin Tsıfrlyq sheshimder ortalyǵynyń Qazaqstanda ashylýyna qoldaý kórsetýge shaqyramyn. Ortalyqty qurý tıimdi óńirlik yntymaqtastyqty damytý úshin mańyzdy katalızator bolady jáne elder arasyndaǵy tsıfrlyq alshaqtyqty aıtarlyqtaı qysqartýǵa ákeledi», - dedi Oljas Bektenov.
Aıta keteıik, Qazaqstanda alǵash ret Azııa jáne Tynyq muhıty óńiriniń konferentsııasy ótip jatyr. Onda Azııa jáne Tynyq muhıty óńiriniń 30-dan astam mınıstri bas qosty.
Aýqymdy jıyndy BUU Azııa jáne Tynyq muhıty óńirine arnalǵan ekonomıkalyq jáne áleýmettik komıssııasy uıymdastyrǵan. Qazaqstanda ATMEÁK konferentsııasyn ótkizý usynysy 79-shy sessııada barlyq múshe memleketterdiń biraýyzdan qoldaýyna ıe boldy, bul eldiń óńirdegi tsıfrlyq tehnologııalar men turaqty damýdy ilgeriletýdegi mańyzdy rólin kórsetedi.
